جهاز بيشحن وعايز تعرف ملف الشحن شغال ولا لأ. هنا الأوسيلوسكوب بيوريك الإشارة زي ما هي. تعالى نشوف إزاي، وبعدها نتكلم في حاجة ناس كتير مش بتعملها: معايرة الجهاز.
إزاي تقيس سويتش ملف الشحن؟
- ادي 5 فولت من الباور سبلاي على VBUS.
- لحم سلك رفيع على المكثف اللي عند رجل السويتش في الملف.
- اظبط الـ Probe على 1X، والقائمة كمان 1X.
- Trigger على Slope، و Sweep على Normal، وخد عينة بـ Single.
- استخدم Measure عشان يطلع لك التردد والقيم.
خد بالك: من غير بطارية، السحب والـ Interrupt مش هيبقوا ثابتين، فالإشارة ممكن تيجي وتروح. ولو القراية طلعت غريبة، راجع الـ X، أنا نفسي غلطت فيها وكان الـ Probe لسه على 10X.
إيه هو Self Calibration؟
جوه الأوسيلوسكوب حاجة اسمها Relay، زي مفتاح بيفتح ويقفل، وبتتأثر بعمليات النقل. Self Calibration هي عملية معايرة ذاتية للجهاز.
إمتى تعمل المعايرة؟
- أول ما تشتري الجهاز.
- بعد ما تنقله من مكان لمكان.
- لما الفصول تتغير والجو يختلف.
- لما تحس إن الـ Probes مش مظبوطة.
الخطوات
- افصل كل حاجة من على الجهاز، بما فيها الـ Probes.
- من قائمة الجهاز ادخل على Self Cal واضغط Start.
- سيبه يخلص، وحط في حسابك إنها بتاخد شوية وقت.
- لما يكتب Self Calibrate done، اعمل Restart.
إزاي تعرف إن الـ Probe بايظ؟
بعد المعايرة وصل الـ Probe على نقطة الاختبار بتاعة الجهاز، واضغط Auto. لو مش شايف موجة مربعة، ساعات ده بيأكد إن الـ Probes فيها مشكلة.