هل كلفت خاطرك مرة تفهم الملاحظات اللي على جنب المخطط؟ ولا بتفتحه دايمًا عشان تدور على المسارات وقيم المكونات وتوصيلها توالي وتوازي؟
إيه اللي في الدايرة؟
بص في الصورة كويس، هتلاقي:
- موسفيت رمزه Q5000.
- مسار BUS_DET جاي من آيسي الـ OVP من الرجل B1، اللي كتير بيهملوها وقت التعويض.
- مسار VBAT، وهنا بالمناسبة هو جهد التغذية الرئيسي مش جهد البطارية.
- مسار IFPMIC_BUS_DET المسؤول عن التنبيه بوجود الشاحن.
- ثلاث مقاومات، ومكثفين OPEN (يعني مش موجودين على البوردة في تصميم موديل SM-A125F ده).
- إشارة nPWRON جاية من آيسي الشحن نفسه لبوابة الموسفيت.
لو حاولت تفسر الدايرة دي على إنها بتنبّه آيسي الشحن بوجود شاحن، هتلاقي حاجات غريبة. إزاي هننبّه آيسي الشحن بالشاحن وبوابة الموسفيت نفسه بتتحكم فيها إشارة جاية من آيسي الشحن؟ يعني بالشكل ده آيسي الشحن شغال قبل ما يبقى فيه مصادر طاقة أصلاً؟ السؤال ده سيبه تفكر فيه، ولو فهمتها صح هتكتشف إنك كنت فاهم فكرة عملها غلط.
ارجع للملاحظات
فوق المربع مكتوب بخط رفيع VBUS -> 220MS -> VBAT. دي بتديك معلومة مهمة: الزمن اللازم لانتقال جهد الشحن لجهد التغذية الرئيسي هو 220 مللي ثانية.
وفي الملاحظة اللي تحت في المربع: delay: 0.9S -> 0.07S. دي معناها التوقيت اللي بتاخده الدايرة عشان تقوم بدورها، وهو بيعتمد على وجود مكثف أو اتنين أو عدم وجودهم (OPEN). في الدايرة دي هما OPEN، فتوقيت عمل الدايرة أقل حاجة 0.07 ثانية.
هستفيد إيه من التوقيتات؟
لو عندك أوسيلوسكوب أو لوجيك أناليزر، افهم توقيت عمل كل مرحلة في الدايرة، ووصّل أسلاكك على نقط نهاية كل مرحلة، وادّي الجهاز الشاحن، وتابع توقيت خروج الجهد لكل مرحلة. هتعرف التأخير حصل فين، وتصلح العطل من غير ما تمسك أفوميتر أو تقيس ممانعة واحدة.
وخد معاك تمرين: افتح مخطط الجهاز، لمّ شوية ملاحظات من دايرة الشحن، واحسب الجهاز محتاج كام ثانية عشان يمرر تيار الشحن من الشاحن لمسار البطارية.