شوفت فني لقى مكثف فيه شورت، راح شايله ورماه؟ طب وانت تعمل كده؟ مش كل مرة. فيه حاجة اسمها قواعد خلع المكثفات، ولازم تفكر في الآثار الجانبية قبل ما ترمي أي مكثف.
عشان تشيله وترميه وانت مطمن، لازم التلات شروط دول يتحققوا مع بعض.
الشرط الأول: يكون المكثف توازي
طب هو فيه مكثف توالي أصلًا؟ آه. مكثف Bootstrap في دائرة الشحن مثال واضح، وده جزء مكمل لدائرة Buck، وعلى طرفيه جهدين مختلفين. لو المكثف توالي، يبقى ماينفعش تشيله وترميه.
الشرط التاني: يكون مع الأرضي
يعني طرف من طرفين المكثف أرضي. طب هو فيه توازي مش مع الأرضي؟ آه، هتقابله في دواير باور الشاشة، واسمه مكثف Pump. ده مسؤول عن دائرة Inverter جوه آيسي باور الشاشة، الدايرة اللي بتولد الموجب 5 فولت والسالب 5 فولت اللي بتشغل الشاشة.
الشرط التالت: وجود بديل بنفس السعة
لازم تتأكد إن فيه مكثف تاني بنفس السعة على نفس المسار. مثال: مسار عليه تلات مكثفات، وواحد فيهم بايظ. لازم تتأكد إن له بديل على نفس المسار بنفس السعة بتاعته.
لكن لو دخلت على دايرة شحن لقيت فيها مكثف PMID واحد، واكتشفت فيه شورت، ماينفعش تشيله وخلاص. هات واحد بنفس السعة.
إيه اللي يحصل لو خلعته من غير الشروط؟
الجهاز هيشتغل قدامك والدنيا زي الفل، وبعدها تتفاجئ بعطل تاني مع الزبون. في مثال مكثف PMID الوحيد: الجهاز ممكن يرستر أو يقطع باور مع فصل الشاحن، أو يبدأ يعمل شحن وهمي، علامة الشحن موجودة والبطارية مش بتزيد.
- توازي.
- مع الأرضي.
- له بديل بنفس السعة على نفس المسار.
التلاتة موجودين؟ شيله وارميه وانت مطمن. واحد ناقص؟ يبقى لازم تركب مكانه.