احنا حافظين أصفار الباور سبلاي 0.000: اللي يسار العلامة العشرية بالأمبير، واللي يمينها بالمللي أمبير. جبت منين الصفر الخامس ده؟ أنا ما جبتش، اللي جابه باور سبلاي Aixun P2408S.
إيه هو الصفر الخامس؟
لما تشغل الـ Aixun بتلاقي مكتوب على الشاشة 000.0، والفاصلة هنا في الآخر. الأصفار يسار العلامة العشرية بتنطقها مللي أمبير، والصفر الوحيد اللي يمين العلامة هو جزء من المللي أمبير. لاحظت إن في بعض البوردات الرقم ده مش بيكون 0 ولكن بيحمل قيمة من 1 إلى 9، يعني البوردة بتستهلك قبل الضغط على زر الباور تيار بين 0.1 و0.9 مللي أمبير.
ليه؟ عمرك سألت نفسك لما بتقفل الموبايل وترجع تشغله من غير فصل البطارية، إزاي بيفضل محافظ على الوقت والتاريخ؟ ده شغل قطاع الـ Digital سواء في المعالج أو آيسي الباور. والكريستالة (المذبذب) اللي بتدي إشارة CLK لقطاع الديجيتال ده ساعات بتكون مع آيسي الباور، وساعات مع المعالج.
وقطاع الديجيتال ده هو الممرر الأساسي لجهد مفتاح الباور. يعني زي معالج صغير بيستقبل أمر التشغيل. فالأجهزة انقسمت لصنفين:
الصنف الأول: المذبذب مع آيسي الباور
هتلاقي السحب على الصفر الخامس من 1 إلى 9 جزء من المللي أمبير. ولو الجهاز ده ما استجابش لضغطة الباور، وفيه جهد على مسار مفتاح الباور وفحصته ومكوناته لقيتهم سليمين، يبقى العيب في آيسي الباور.
الصنف التاني: آيسي الباور من غير كريستالة، والمعالج هو اللي بيديله CLK
أول ما توصله على الباور سبلاي بيسحب لوحده لحظات لحد 90 مللي أمبير (في بعض الحالات 40 فقط) وبعدين يرجع للصفر، قبل ما تضغط على مفتاح الباور، بمجرد التوصيل. كده غذيت المعالج تلقائيًا واشتغل قطاع الديجيتال واستنينا أمر مفتاح الباور.
فلو جالك نفس العطل (مافيش استجابة لزر الباور مع وجود الجهد وسلامة المسار) هيكون عيبك في المعالج. وبعض البوردات دي مش بتدي أي استجابة لضغطة الباور لو المعالج برة البوردة، وأي حد شغال ريبولينج هيصدق كلامي.
إزاي تستفيد منه
- وصّل البوردة على الباور سبلاي وركز في الجزء من المللي أمبير قبل ما تضغط الباور.
- لو السحب صفر، روح للمخطط: لو المذبذب مع آيسي الباور يبقى عيبك آيسي باور، ولو مع المعالج يبقى عيبك معالج.
اتجربت على بوردات كتير بآيسي باور ومعالج MediaTek، وسايبلكم التجارب على الكوالكوم والآيفون وباقي المنظومات. وخد بالك: التجربة اشتغلت فقط مع الإصدار اللي قلت عليه (اللي قبله من غير S كان بيهنج أحيانًا)، وفيه باور سبلاي تاني اسمه Yihua فيه صفر خامس برضه.