موبايل فاصلة باور قدامك، حطيت الأفوميتر على وضع البازر على مسار تغذية المعالج مع الأرضي، والبازر صفر. تقول تسريب؟ استنى. ده خطأ قاتل كتير من الفنيين بيقعوا فيه، خصوصًا في حالات الفاصلة باور، والخطأ هو القياس على مسارات تغذية المعالج (BUCK) بوضع البازر مع الأرضي. والـ BUCK هنا هي مسارات الجهد الخارجة من آيسي الباور للمعالج.
ليه المشكلة دي بتحصل؟
زمان كانت المعالجات بنواة واحدة أو اتنين بس، والمقاومة الكلية لقطاع الـ CPU كانت عالية، فلما تقيس على البازر ما كانش بيطلع صوت.
دلوقتي مع تعدد الأنوية، الشركات صممت المعالجات بمقاومة كلية منخفضة جدًا عشان تقلل استهلاك الطاقة والحرارة. النتيجة إن أي قياس على البازر هيدي صوت مع الأرضي، وده يوهمك إن فيه تسريب.
طب ليه المقاومة بتقل؟ بص على مثال المقارنة بين آيسي بنواة واحدة وآيسي بـ 4 أنوية: النواة الواحدة مقاومتها 400 أوم. الأربع أنوية متوصلين بالتوازي، كل واحدة 400 أوم، فالحساب بيبقى كده:
المقاومة الكلية لـ 4 أنوية بالتوازيRt = 400/4 = 100 ohm
الكارثة بتحصل إزاي؟
- الفني يقرر إن آيسي الباور تالف ويغيره.
- يرفع ويشبلن وينزل المعالج، ظنًا إن فيه شورت تحته.
- أو الأسوأ: يحقن على المسارات بتيار عالي.
تحذير: الحقن بتيار عالي على مسارات تغذية المعالج، ممكن 5 أمبير، بيسخن المعالج ويدمره بالكامل.
طيب نحلها إزاي؟
- قياس الممانعة لازم يكون بالمقارنة: بوردة سليمة قصاد بوردة تالفة، وبنفس نوع الأفوميتر.
- الممانعة في الوضع السليم أحيانًا بتوصل لـ 0.005 أوم، وده طبيعي جدًا ومش معناه إن فيه تسريب.
- المخططات مش هتحل المشكلة: معظم برامج المخططات ما بتعرضش الممانعات بشكل متوافق مع الأفوميترات المنتشرة في مصر زي SUNSHINE DT-17N. الاستثناء الوحيد حاليًا هو تطبيق مسلة اللي بيرفع ممانعات متوافقة.
قبل ما تحكم على آيسي الباور أو المعالج، لازم تكون عارف إن مقاومة مسارات تغذية المعالج منخفضة بشكل طبيعي. أي قرار متسرع في القياس أو الحقن ممكن يدمر البوردة بالكامل.