هل لازم أشتري أوسيلوسكوب؟ استخداماته الأربعة وإزاي تختار نوع مناسب

لازم أشتري أوسيلوسكوب ولا أمشيها بالحب؟ ولو هشتري، أشتري إيه؟ تعالى نشوف الأول هو بيفيدنا في إيه.

استخداماته الأربعة

أولًا: فحص عمليات السويتش (SW / LX) بين الآيسيهات والملفات، للحكم على سلامة الآيسي أو الملف. وده إلى الآن مالوش أي بديل عملي أو علمي غير الأوسيلوسكوب. كل طرق القياس بالجهد أو الممانعة أو البازر فيها قصور.

ثانيًا: معرفة حالة الإشارات وأشكالها. الإشارات بتكون قيمها بالجهد غالبًا بين 1.8 فولت و3.3 فولت، وبعضها بالمللي فولت. أهمها:

• EN (Enable): إشارة تفعيل بتخرج من المتحكم لتفعيل دائرة، وغالبًا جهد مستمر. ممكن تكون نبضات 0 و1.8 فولت وعرض النبضة له وظيفة إضافية، وتسمى PWM (Pulse Width Modulation). وفيه إشارات تفعيل مش بتحمل اسم EN، زي TA (تفعيل اللمس) وPD (غلق الكاميرا).
• RST (Reset): من وجهة نظري إشارة تفعيل متغيرة الحالة: أول نبضة بتشتغل كتفعيل، وأي تغير بعدها أمر إيقاف ثم إعادة تفعيل. غالبًا بتلاقيها في المخطط مع رمز L، يعني LOW: الإشارة HIGH عليها جهد زي 1.8 فولت، ولما المتحكم يفعلها يحولها لـ LOW صفر فولت ويرجعها HIGH.
• INT (interrupt) وCLK (clock) وDET (detect) وCMD (command)، ولكل منهم آلية عمل خاصة.

الأفوميتر مش هيتابع تغيرات الريسيت لأنها بتحصل في أجزاء من الثانية، هيظهرلك بس HIGH وجهد 1.8 فولت. هنا يجي دور الأوسيلوسكوب.

مثال على إشارة LCM_RESET_L: جهاز بيانات وإضاءة، وفحصت الدائرتين كويس بالأفوميتر وبدلت القطع الأساسية، وأنت في حيرة: العيب في الشاشة ولا المعالج؟ الفيصل هو شكل إشارة الريسيت. لو المعالج حولها من HIGH إلى LOW ورجعها HIGH، فالعيب 99% في الشاشة. ولو ما عملش كده، فعندك خلل إما في المعالج أو في فحصك لأجزاء الدائرة.

ثالثًا: مشاهدة بروتوكولات التواصل بين المعالج والآيسيهات، زي i2c وspi وmipi dis وmipi rffe وspmi وuart.

رابعًا: فك التشفير Decode لمراقبة حديث المعالج والآيسيهات. وهنا بتختلف القدرات الفعلية للأوسيلوسكوب وبيختلف ثمنه.

إزاي تختار

• المدى: أي أوسيلوسكوب مداه 100MHz وسعة الـ Trigger 1GS/s هيكون مناسب لأول وظيفتين.
• عدد القنوات: الفرق بين 4 قنوات وقناتين هو الوظيفة التالتة، رؤية البروتوكولات. لو البروتوكول رجوله أكتر من مسارين، هتشوفه كل مسارين على حدة بجهاز القناتين.
• الـ Decode: هنا بتجربتي.

اشتريت UNI-T UTD2102CEX وكان قيّم جدًا في أول تلات وظائف، بس مافيهوش فك تشفير فكنت أكتفي بعرض البروتوكولات. بعدها اشتريت UNI-T UPO2104E، وقائمة Math فيه فيها Decode لـ i2c وspi، بس برضه ما استفدتش بيه إلا في أول تلات استخدامات. ليه؟ لأن عشان تفك تشفير بروتوكول لازم تاخد عينة، واللي بياخدها هو الـ Trigger، وقائمته مش بتدعم البروتوكولات، فبتضطر تضبطها مرة على Auto ومرة على Serial.

اشتريت RIGOL DS1102 Z-E وحققت بيه الأربع استخدامات، بس الـ Decode فيه ما لبّاش رغبتي: كنت عايز أشوف فترات زمنية طويلة من البروتوكول في نفس الوقت، وشاشة أي أوسيلوسكوب مش هتستوعب كده مهما لعبت في T/Div. فاضطريت أشتري Logic Analyzer من نوع DS LOGIC PLUS، وكان الحل المثالي لعمليات الـ Decode.

ترشيحي في الآخر

• أي أوسيلوسكوب من UNI-T أو Rigol أو Hantek بمدى 100 ميجا هرتز و1GS/s مناسب لأول تلات وظائف، مع التدقيق في قائمة Trigger لأنها الفيصل في تسهيل الشغل.
• أفضل جهاز لفك تشفير بروتوكولات التواصل هو DS LOGIC PLUS.
• الاتنين لا غنى عنهم لو عايز تنتقل للمستوى الاحترافي.

وسؤال هيجي في دماغ شباب: وإيه رأيك في الأفوميتر اللي فيه أوسيلوسكوب زي Hantek 2C42؟ ممتاز كأفوميتر ومعاير قريب جدًا من Fluke، وكأوسيلوسكوب معقول في الاستخدام الأول والتاني في نطاق 40 ميجا هرتز. ولو عايز الاستخدام التالت تحتاج الإصدار الأعلى 2C72 (70 ميجا هرتز)، بس التعامل مع قائمة Trigger فيه صعب. فأنا بنصحك لو هتجيبه تكتفي بـ 40 ميجا وتعيش حياتك بزرار Auto، مناسب جدًا للمبتدئين.

وحتى لو عندك أوسيلوسكوب، لسه محتاج تفهم المخطط وآلية عمل الدوائر وترتيب إشاراتها.