ناس كتير مابتعرفش ليه آيسي الشبكة اتسمى BaseBand. خلينا نوضح الرؤية شوية.
الاسم نفسه
كلمة baseband في الإنجليزي معناها النطاق الأساسي. وبتتقال على واحد من أشهر آيسيهات البوردة، المسؤول عن معالجة بيانات الشبكة. ولذلك هو بيعتبر نوع من أنواع المعالجات.
الموجات والتردد
كل موجة بتنتقل حوالينا في الجو ليها تردد، وهي الخاصية اللي بتميز موجات الراديو عن التلفزيون عن الواي فاي عن الدش. كلها موجات، بس بتختلف عن بعض بالتردد.
لو كانت كل الموجات دي ليها تردد واحد، هيبقى في تقارب شديد بينهم وتداخل. فالحل: كل موجة ليها مدى أو نطاق من الترددات. موجات الهاتف المحمول ليها نطاق معين من الترددات بتبعت وتستقبل فيه.
ولذلك آيسي إدارة الشبكة اتسمى بآيسي النطاق الأساسي (لموجات الهاتف المحمول).
وإزاي ينتقي الموجة؟
سؤال: كل الموجات الموجودة في الجو تقريبا بتخبط في الأنتينة (الهوائي، لاقط الإشارة). فإزاي الآيسي بينتقي من وسط الزحمة دي الموجة دي بالتحديد؟ الإجابة إن في دايرة الاستقبال دايرة بتمرر نطاق ترددات معين وتمنع الباقي، واسمها فلتر Band pass filter.
