Skip to content

This chapter is available in Arabic only.

دليل Yalla Mobile Desktop · الفصل 2

أدوات أندرويد: ADB و YM Health

شاشة «مراقبة ADB» في Yalla Mobile Desktop بتقرا موبايل أندرويد متوصل بكابل: اللوج، وملفات الأعطال، وتقرير Bugreport، وأوامر ADB جاهزة بضغطة. ومن تبويب YM Health بتثبّت تطبيق الفحص على الموبايل وتشغّل اختباراته للهاردوير قبل الإصلاح وبعده.

بيحل إيه

بتعرف الموبايل فيه إيه من غير ما تفكّه: لوجات أندرويد وملفات الأعطال وحالة البطارية، وفحص هاردوير كامل على الموبايل نفسه قبل التسليم.

محتاج إيه

  • «USB debugging» (تصحيح أخطاء USB) شغال من خيارات المطور، وموافق على رسالة «السماح للكمبيوتر ده» على الموبايل.
  • كابل داتا سليم (مش كابل شحن بس).
  • حساب YallaMobile متسجل بيه في البرنامج: تحليل Bugreport وموافقة فحص YM Health محتاجينه.
  • أندرويد 10 أو أحدث عشان YM Health.
  • روت بس لو عايز «Kernel Log»؛ باقي التبويبات شغالة من غيره.

خطوة بخطوة

الخطوة 1 من 5

1 جهّز الموبايل: USB debugging

على الموبايل افتح خيارات المطور وشغّل «USB debugging» (تصحيح أخطاء USB)، ووصّله بكابل داتا سليم. من البرنامج افتح «مراقبة ADB» من القايمة.

الخطوات مكتوبة (5)
  1. جهّز الموبايل: USB debuggingعلى الموبايل افتح خيارات المطور وشغّل «USB debugging» (تصحيح أخطاء USB)، ووصّله بكابل داتا سليم. من البرنامج افتح «مراقبة ADB» من القايمة.
  2. دوس «فحص الأجهزة»البرنامج بيدوّر على الموبايلات المتوصلة. لو «فحص تلقائي» شغال، بيلاقي الموبايل لوحده أول ما يتوصل. أول مرة الموبايل بيسألك تسمح للكمبيوتر ده؛ وافق على الرسالة اللي على شاشته.
  3. الموبايل ظهر في «الأجهزة المتصلة»الكارت فيه اسم الموديل زي ما الموبايل بيقوله (هنا NTH_NX9، يعني HONOR 50)، ورقمه التسلسلي (مخفي هنا)، ونسبة الشحن والحرارة. لو الموبايل مش ظاهر: غيّر الكابل، واتأكد إن USB debugging شغال وإنك وافقت على رسالة الكمبيوتر.
  4. اختار الموبايلدوس على الكارت. فوق بقى مكتوب «الجهاز: NTH_NX9»، وكل التبويبات من هنا ورايح بتشتغل على الموبايل ده بس.
  5. معاينة الشاشة على الكمبيوتر بس«معاينة الهاتف» بتعرض شاشة الموبايل على الكمبيوتر بتاعك، ومكتوب جنبها «محلية فقط»: الصورة مش بتتبعت لأي مكان. لحد ما أول صورة توصل بيكتب «في انتظار صورة الشاشة».
الخطوة 1 من 9

1 Logcat: لوج أندرويد وهو شغال

Logcat بيعرض اللي أندرويد بيكتبه لحظة بلحظة. اكتب كلمات زي اسم تطبيق بيقفل أو «camera»، والسطور اللي فيها بتتعلّم، وبعدين «بدء المراقبة» وكرّر العطل على الموبايل.

الخطوات مكتوبة (9)
  1. Logcat: لوج أندرويد وهو شغالLogcat بيعرض اللي أندرويد بيكتبه لحظة بلحظة. اكتب كلمات زي اسم تطبيق بيقفل أو «camera»، والسطور اللي فيها بتتعلّم، وبعدين «بدء المراقبة» وكرّر العطل على الموبايل.
  2. «أوامر ADB»: أوامر جاهزةأوامر بضغطة واحدة للموديل ونسخة أندرويد والبطارية والمساحة والرامات والتطبيقات. ليها مشهد لوحدها تحت.
  3. Kernel Log: dmesg (سجل النواة)سجل الكيرنل بيبيّن مشاكل الهاردوير والدرايفرات. أغلب الموبايلات مش بتسمح بقرايته من غير روت، والبرنامج بيقولك ده صريح وبيقترح Logcat أو Bugreport بدله.
  4. Bugreport: تقرير أندرويد الكامل«اعمل Bugreport» بيطلب من الموبايل bugreport كامل (لوجات و dumpsys وملفات الأعطال)، وده بياخد دقايق. بعدها «افتح Bug Report وافحصه» بيقراه ويطلعلك المشاكل، والتقارير بتتحفظ في «Bug Reports المحفوظة».
  5. Tombstones: ملفات الأعطاللما برنامج أو خدمة في أندرويد تعمل crash (تقع)، النظام بيكتب ملف tombstone. «تحميل الـ Tombstones» بيجيبها من الموبايل. على موبايلات كتير القايمة ممكن تطلع فاضية من غير روت، والـBugreport بيبقى هو الطريق.
  6. Pstore: آثار الـkernel panicpstore بيحتفظ بآخر رسايل الكيرنل قبل ريستارت مفاجئ. لو فيه ملفات اختار واحد تشوف محتواه، ولو مفيش البرنامج بيقول «مفيش ملفات pstore» أو «مفيش kernel panic متسجل».
  7. «استهلاك الجهاز»: المعالج والرامات وقت التشغيل«بدء المراقبة» بيرسم استهلاك المعالج والرامات وانت شغّال على الموبايل، عشان تشوف تطبيق بيسخّن الموبايل أو ياكل الرامات.
  8. «إدارة التطبيقات»قايمة التطبيقات المتسطبة على الموبايل. منها كمان بتمسح نسخة YM Health قديمة لو البرنامج طلب منك ده.
  9. YM Health: الفحص على الموبايل نفسهآخر تبويب بيثبّت YM Health على الموبايل ويشغّل اختباراته. ليه مشهد لوحده تحت.
الخطوة 1 من 5

1 الأوامر مقسومة على حسب اللي عايز تعرفه

الأزرار مجمّعة: الموبايل، البطارية، المساحة، الذاكرة، التطبيقات. تحت اسم كل زرار مكتوب الأمر اللي هيتنفّذ، فانت عارف بالظبط البرنامج بيعمل إيه.

الخطوات مكتوبة (5)
  1. الأوامر مقسومة على حسب اللي عايز تعرفهالأزرار مجمّعة: الموبايل، البطارية، المساحة، الذاكرة، التطبيقات. تحت اسم كل زرار مكتوب الأمر اللي هيتنفّذ، فانت عارف بالظبط البرنامج بيعمل إيه.
  2. «موديل الموبايل»بينفّذ getprop ro.product.model. الموبايل رد بـNTH-NX9، وده HONOR 50. اعرف الموديل بالظبط قبل ما تجيب قطعة أو سوفت.
  3. «إصدار أندرويد»بينفّذ getprop ro.build.version.release. الرد 13، يعني أندرويد 13، وده كفاية لـYM Health (محتاج أندرويد 10 أو أحدث).
  4. «فحص البطارية»بينفّذ dumpsys battery. اقرا: AC powered يعني الشاحن متوصل، level نسبة الشحن (80)، voltage فولت البطارية بالملّي (4106 يعني 4.1 فولت)، و health: 2 يعني البطارية سليمة في نظر أندرويد. Max charging هي أقصى حاجة الشاحن عرضها: 5 فولت و2 أمبير (القيم بالميكرو).
  5. «أمر تاني (للمحترفين)»اكتب أي أمر ADB من غير كلمة adb في الأول واضغط Enter أو «تشغيل». الأمر بيتنفّذ على الموبايل المختار بس. لو الأمر ممكن يغيّر حاجة على الموبايل أو يعيد تشغيله، البرنامج بيسألك «تأكيد الأمر» قبل ما ينفّذ. «مسح» بيفضّي النتيجة.
الخطوة 1 من 6

1 البرنامج بيشوف YM Health على الموبايل

أول ما تفتح التبويب، البرنامج بيسأل الموبايل عن YM Health. هنا رد: «YM Health 17 متثبت (3.0.11)»، يعني التطبيق موجود ورقم نسخته 17 (3.0.11).

الخطوات مكتوبة (6)
  1. البرنامج بيشوف YM Health على الموبايلأول ما تفتح التبويب، البرنامج بيسأل الموبايل عن YM Health. هنا رد: «YM Health 17 متثبت (3.0.11)»، يعني التطبيق موجود ورقم نسخته 17 (3.0.11).
  2. «ثبّت / حدّث YM Health»لو على الموبايل نسخة أقدم أو مختلفة، البرنامج بيشيلها ويثبّت آخر نسخة من مكتبته، ولو النسخة نفس النسخة أو أحدث بيسيبها. شغّل «تثبيت تلقائي عند توصيل موبايل» لو عايز ده يحصل لوحده. لو الموبايل قفل التثبيت، البرنامج بيقولك السبب والحل (زي «التثبيت عبر USB» أو Play Protect).
  3. اختار نوع الفحص«فحص بس» بيشغّل اختبارات YM Health على الموبايل دلوقتي. «فحص + متابعة بعد الإصلاح» بتفحص قبل التسليم وتجهّز متابعة للموبايل عند العميل يوم أو 3 أو 7 أيام. و«مراقبة عطل متقطع» للعطل اللي بيظهر ويختفي: YM Health يفضل يسجّل على موبايل العميل المدة اللي تختارها، والنتيجة توصلك في البرنامج.
  4. «ابدأ الفحص»: الموافقة الأولقبل الفحص البرنامج بيقولك هيعمل إيه بالظبط: يثبّت أو يحدّث YM Health ويشغّل اختباراته بس، من غير Bug Report ولا أوامر ADB. خد موافقة صاحب الموبايل، لأن في اختبارات محتاجة تلمس الموبايل أو تتكلم قدامه.
  5. اختار الحساب ووافقاختار «حسابي الشخصي» وعلّم على «موافق على الفحص ورفع التقرير في النطاق المختار». زرار «ابدأ الفحص» بيفضل مقفول لحد ما توافق. «رجوع» بيقفل الرسالة من غير ما يعمل حاجة.
  6. الموبايل في إيد صاحبهالاختبارات بتشتغل على الموبايل، وبعضها هيطلب منك تلمس الشاشة أو تتكلم في الميكروفون. سيب الموبايل متوصل وشاشته مفتوحة لحد ما يخلص.

اقرا النتيجة

اللي البرنامج بيقولهمعناهتعمل إيه بعدها
مفيش عطلالاختبار اتعمل والجزء ده اشتغل.كمّل على باقي النتايج.
عطل مهمعطل بدرجة عالية في جزء مهم.ابدأ بيه، وأكّده بالقياس أو بتبديل القطعة قبل ما تقول للعميل.
فيه مشكلةمشكلة متوسطة، أو حاجة محتاجة متابعة.أعد الاختبار ده لوحده، وراجع الجزء بإيدك.
علامة بسيطةعلامة خفيفة: مش عطل لوحدها.اكتبها في ملاحظات التسليم وتابعها.
نتايج مختلفةمصدرين للفحص قالوا كلام مختلف عن نفس الجزء.متحكمش من النتيجة: أعد الاختبار وانت ماسك الموبايل، أو قيس بنفسك.
مش مدعومالموبايل ده مش بيدعم الاختبار ده (مثلًا مفيش فيه القطعة).مش عطل. اتأكد بس إن الموبايل فعلًا مفيهوش الحاجة دي.
ما اتفحصشالاختبار ما اتعملش أو ماخلصش، فمفيش نتيجة.«ما اتفحصش» مش معناها «سليم». شغّل الاختبار ده تاني لو الجزء يهمك.

حالة حقيقية

HONOR 50 متوصل للفحص قبل التسليم

HONOR 50 (NTH-NX9)، أندرويد 13

وصّلنا الموبايل بكابل داتا وشغّلنا USB debugging. البرنامج لقاه في «الأجهزة المتصلة» باسم NTH_NX9، بشحن 80% وحرارة 33.5 درجة.

من «أوامر ADB»: «موديل الموبايل» رد NTH-NX9، و«إصدار أندرويد» رد 13، و«فحص البطارية» قال إن الشاحن متوصل (AC powered: true)، والشحن 80%، وفولت البطارية 4106 ملي فولت، و health: 2 يعني البطارية سليمة في نظر أندرويد، وأقصى شحن الشاحن عرضه 5 فولت و2 أمبير.

تبويب YM Health قال إن التطبيق متثبت (YM Health 17، 3.0.11). اخترنا «فحص بس» ووافقنا في رسالة الموافقة عشان نبدأ الاختبارات على الموبايل.

شوف الحالة دي في الخطوات فوق ↑

حدود لازم تعرفها

  • «Kernel Log» محتاج روت على أغلب الموبايلات. من غيره البرنامج بيقولك إنه مش متاح، واستخدم Logcat أو Bugreport بداله.
  • تحليل Bugreport بيرفع نسخة من التقرير لخادم YallaMobile عشان يتحلل، وقبل الرفع البرنامج بيطلب «موافقة رفع التقرير». البرنامج بيقلل البيانات الشخصية المعروفة في نسخة على جهازك قبل الرفع، بس IMEI ومعرّفات الجهاز بتفضل، وممكن تفضل بيانات شخصية تانية. الملف الأصلي مش بيتغير.
  • بعض اختبارات YM Health محتاجة الفني يلمس الموبايل أو يتكلم قدامه، فخلّي الموبايل في إيدك وشاشته مفتوحة.
  • «فحص + متابعة بعد الإصلاح» بيتابع الموبايل عند العميل، والمتابعة محتاجة عضوية ورشة (فصل إدارة الورشة).
  • النتيجة نقطة بداية، مش بديل للقياس. «ما اتفحصش» مش «سليم»، و«نتايج مختلفة» معناها أعد الاختبار.

اختبر نفسك

1. أول حاجة تشغّلها على الموبايل عشان البرنامج يشوفه؟

2. النتيجة قالت «ما اتفحصش» على الكاميرا. يعني إيه؟

3. إيه الفرق بين «فحص بس» و«فحص + متابعة بعد الإصلاح»؟

4. موبايل بيعمل ريستارت لوحده. تبص فين الأول؟

5. تبويب «Kernel Log» فاضي وبيقول مش متاح. ليه؟

جاوبت 0 من 5

الفصل الجاي

اتراجع على Yalla Mobile Desktop 3.0.26 (Build 61)