كتير بيدخلنا جهاز عطله بسيط ومحدد، وفجأة الأمور بتتطور لدرجة إن الفني ممكن يشتري جهاز جديد للعميل أو يقع في مشكلة كبيرة بسبب بيانات العميل. ونرجع نسأل: إيه اللي حصل؟ أنا ما عملتش حاجة غلط! الشرح ده مهم لأي حد شغال فاست أو مبتدئ أو بيودي شغله لناس محترفة تخلصهوله.
قبل ما تفتح الجهاز
١. الاتفاق الخطأ. القاعدة الأساسية في الصيانة: العميل كداب لحد ما يثبت العكس. وأنا ما اقصدش الكدب الحرفي، ولا إنه بيخفي حاجات عشان تكلفة الصيانة ما تترفعش. مثال: جهاز كان بيسخن جدًا مع العميل ووقع فجاب شاشة. طبيعي تركب شاشة والجهاز يفتح، بس اللي مش متوقعه إنه يقف على الشعار الأول، لأن الصدمة اللي كسرت الشاشة ضررت رجول المعالج اللي أصلًا فيها كسور بالقصدير، والوقعة كملت عليها (بس نصيبك إنها حصلت على إيدك). فأنا دايمًا بنصح: خلي الاتفاق مفتوح، وما تحطش سعر أكيد، حط رينج للسعر.
أثناء الشغل
- ٢. الفك والتركيب الغلط: أغلب الناس بترفع البوردة من الهاوس أو الشاسيه غلط، وياما حاجات اتكسرت ومكونات طارت. وسوائل الفك اللي بتذوب اللاصق أغلبها فيها أحماض، وأكبر مسبب للأكسدة هو الأحماض. حرارة السخان ضارة جدًا بأشباه الموصلات، والمواد اللاصقة بتسد فتحات تهوية لو اتحطت في أماكن غلط ووصلت للبوردة.
- ٣. الكهرباء الاستاتيكية: فنيين كتير بيستهينوا بيها مع إن نص الأعطال بتحصل بسببها. أي مكان صيانة مطابق للمواصفات هتلاقيهم شغالين ببادات Antistatic ولابسين أساور متأرضة. المثال: مكثف مشحون وأجبرته ياخد شحنات زيادة فجأة، يا يحصل فيه شورت، يا يفرّغ بشكل أسرع وأقوى وبجهد أعلى في المسار فيتلف الآيسي. وكهربة جسمنا توصل في المتوسط من مئات لآلاف الفولتات.
- ٤. المسامير: مسمار طويل مكان قصير بيقطع مسارات أو بيفصل شاشات. وكمان بعض المسامير غير ممغنطة، ومجرد تبديلها بمسامير ممغنطة بيسبب تلف الـ Compass أو الـ ALS أو الـ Gyro أو الحساسات بشكل عام.
- ٥. القياس على أوضاع بتخرج جهد زي الأوم وسعة المكثفات والبازر والدايود والبوردة متوصلة بمصدر طاقة (تفاصيل تحت).
- ٦. الهوت إير: سوء تقدير للحرارة واندفاع الهواء واتجاه الهوت إير. وناس بتستخدم هواء دوراني في كل حاجة من غير تقدير للمساحات وفتحة النوزل وحجم العنصر المراد خلعه.
- ٧. أي صاجة تحتها كولر (مادة تبريد): بعض المواد بتتمدد بالحرارة وتضغط على المكون اللي تحتها. وبعضها بيتفتت بسوائل التنظيف ويبقى عجينة يصعب تنظيفها، وبتترسب مع بقايا الفلكس والثنر وتعمل توصيل جزئي أو كلي للتيار.
تحذير: لو بتقيس على وضع الأوم أو السعة أو البازر أو الدايود والبوردة موصل فيها مصدر طاقة، قيم القياس هتبقى غلط، وكمان بقى معاك مصدرين طاقة على نفس مسار القياس. بعض الأفوميترات بتوقف ده، لكن الأغلب لأ، وهنا بيحصل شورتات وتلف للآيسيهات.
اللي ذكرتهم فوق أشهر الأمثلة وأكتر أسباب التلف المفاجئ للبوردة أثناء شغلك. مش قصدي أحرجك كفني، قصدي أنبهك قدر المستطاع.