ليه بنحصر السحب الضعيف (من 1 إلى 200 مللي أمبير) على الباور سبلاي في أعطال المعالج والذاكرة والرام؟ تعالى نفهم الأول يعني إيه سحب أمبير.
خمس حقائق
- التيار يُطلب ولا يُفرض. أول ما بتشغل الباور سبلاي بيكون على صفر أمبير 0.000، لأنه كمصدر طاقة ما بيخرجش تيار إلا لما يطلب منه.
- بداية طلب التيار هي بداية الاحتكاك مع الأرضي بشكل مباشر أو غير مباشر. ضغطة زر الباور في أبسط فكرة هي سحب جهد ناحية الأرضي، فبنسمح بمرور التيار للأرضي مع الحد منه بمقاومة، ولذلك ما بنسحبش كامل قدرة الباور سبلاي (5 أمبير) مع ضغطة الزر.
- مسؤولية مسار الطاقة بالكامل. ممكن دائرة تطلب تيار عالي، لكن على الممر آيسي ما وصلهوش أمر بتمرير القدر ده فيوقفه. مثال: Power Supply ← Vbatt ← regulator ← Charger ic ← VPh ← Pmu ic ← Wlan Bias ← Wifi ic. وناهيك عن نقاط اللحامات لكل نقطة على المسار ده.
- دوائر الحماية (OCP): آيسي الشحن وآيسي الباور PMU أغلب تقنياتهم دلوقتي بتعتمد عليها، وبتوقف أي تيار يتجاوز الحد فجأة. وبعضها أوتوماتيكي وبعضها يعتمد على إشارات من المعالج.
- تسلسل الإقلاع. أي إقلاع بيعتمد على تشغيل مجموعة متحكمات بالتتابع، من المعالج البسيط جوه آيسي الباور، للمعالج الأساسي، اللي بياخد الدفة في التحكم في منظومة الباور والشحن، بإشارات زي Hold وReset وint وStay Alive، أو ببروتوكولات أولية زي i2c وSPI. وكمان بيفحص ظروف العمل (حرارة ورطوبة وحساسات ومسارات id)، وفيه موجات CLK رايحة لمنظومات بتولد بروتوكولاتها زي Wifi وRF وNFC.
إذن إيه اللي تقيسه وتشك فيه في الـ 1 لـ 200 مللي
- مسارات الطاقة من كونكتور البطارية لحد خرج آيسي الباور بالكامل.
- لحامات مسارات الطاقة دي. ياما سحب ضعيف اتظبط بمجرد شبلنة آيسي شحن أو آيسي باور، أو حتى كرة قصدير على كونكتور البطارية.
- تغيير الآيسيهات اللي فيها دوائر حماية من التيار العالي، وخصوصًا لو لاحظت تذبذب التحميل وثبوته لحظات عند قيمة معينة.
- فحص الإشارات وبروتوكولات التواصل الأساسية الضرورية للإقلاع.
- فحص مؤشرات قياس الحالة: مقاومات حرارية وحساسات ومقاومات تعريفية id.
- وأخيرًا ثلاثي أضواء المسرح: المعالج، الذاكرة، الرام.