فتحت موبايل فيه كونكتورين بطارية، أول سؤال يجي في بالك: طب الاتنين شغالين نفس الشغل؟ ولو واحد فيهم فيه مشكلة أدور فين؟ عشان أجاوب، فكيت موبايلي الشخصي Honor 50 وجربت بإيدي.
الشاومي عامل الكونكتورين إزاي؟
في Redmi Note 11 Pro و 12 Pro المنظومة معتمدة على ستة إيسيات، والكونكتورين منفصلين عن بعض. هتلاقيهم مكتوبين BAT1 و BAT2، أو Master و Slave، أو Primary و Secondary، كله نفس المعنى.
- الكونكتور الأول واصل على إيسي شحن سريع، وعلى الـ BQ بتاع الشحن العادي.
- الكونكتور التاني واصل على إيسي الشحن السريع التاني لوحده.
- في Note 12 Pro الـ BQ اتشال وحل مكانه إيسي باور مساعد، والفكرة الشغالة لسه هي هي.
Honor 50 مختلف في إيه؟
لما بصيت على البيت ماب اتفاجئت إن الكونكتورين هنا واصلين ببعض على مسار VBAT، والاتنين رايحين على إيسيهات الشحن السريع. طب لو واصلين ببعض، ليه اتنين؟ هنا لازم نجرب مش نفترض.
التجربة: إيه اللي بيحصل لما تفصل كونكتور؟
| الحالة | اللي حصل |
|---|---|
| الكونكتور الشمال بس، تشغيل باور | فايبريشن، الشعار الأول، وماأقلعش |
| نفس الكونكتور مع الشاحن | سحب 700 و 800 ملي أمبير لحد 1 أمبير، رجع 300 و 400، وريستارت |
| الكونكتور التاني بس، تشغيل باور | إقلاع كامل، مع تنبيه Device Temperature Too Low |
| نفس الكونكتور مع الشاحن | علامة الشاحن ظهرت، والسحب أصفار: 2 ملي ورجع صفر |
التنبيه ده لقطة مهمة: معناه إن مسار BAT_THERM مش مع الكونكتور ده، مع الكونكتور التاني. وعلامة الشاحن من غير سحب معناها إن الكونكتور ده مش بتاع الشحن أصلا.
يبقى النتيجة: كونكتور مسؤول عن الاستهلاك وكونكتور مسؤول عن الشحن، حتى لو الاتنين واصلين على نفس المسار. ودي بتفكرني بـ iPhone 11 Pro و Pro Max، كونكتور على الفلاتة السفلية بتاعة الشحن وواحد على البوردة من فوق للاستهلاك.
ليه الشركات وصلت للفكرة دي أصلا؟
- VOOC الأول والتاني: 5 فولت و 4 أو 6 أمبير. الجهد داخل زي ما هو، والدايرة سهلة.
- VOOC 3 بـ 60 وات: 10 فولت داخلين على بطارية 4 فولت. فرق كبير اسمه Waterfall، أو شلال، والبطارية عمرها بيتأثر.
- الحل كان بطارية 8 فولت. بس ظهرت مشكلتين: وقت الاستهلاك محتاج Buck عشان تنزل لـ VPH، ووقت الشحن العادي 5 فولت أقل من البطارية فمحتاج Boost.
- الشاومي خد الفكرة وقسمها كونكتورين: واحد للاستهلاك والشحن العادي والشحن السريع في الوضع المنخفض، وواحد على إيسي شحن سريع لوحده.
الخلاصة العملية: لو جالك جهاز بكونكتورين، ماتعتبرهمش نسخة من بعض. حتى لو واصلين ببعض، واحد لـ الاستهلاك وواحد للشحن.