خلصت ريبولينج، وفردت المادة على سطح المعالج، ولزقت الاستيكر، وقلت كده برّدت. لأ، ده مابيبردش. الناس فاهمة عملية التبريد غلط: المادة مش بتبرد، هي بتنقل.
المادة بتعمل إيه فوق المعالج؟
لما تفرد المادة على سطح المعالج، جزيئات منها بتبدأ تدخل وتتغلغل في المسام اللي في سطح المعالج نفسه. وليها دليل: لو جالك جهاز حديث شوية، المادة نشفت فيه، وحاولت تعمله ريبولينج وتشيلها، هتتفاجئ إن سطح المعالج نفسه بقى بلون المادة. تمسح وتحك ولسه بتحس إنها مسكت في قلبه.
الطريق اللي الحرارة بتمشيه
- المادة بتسحب الحرارة من سطح المعالج، عشان دخلت في مسامه.
- تسلمها لـ البدل النحاس الملزوقة.
- النحاس يشتتها على الشيلد، المعدن اللي بنسميه الصاج.
- الشيلد يوزعها على مساحة أوسع.
يبقى كل حتة في الطريق ليها وظيفة. المادة والاستيكر مجرد موصل حرارة من سطح المعالج للنحاس، بس الحرارة لازم يبقى ليها مكان تروحه.
اللي بيلزق الاستيكر ويقول خلاص
فيه واحد بيحط الاستيكر ويقولك كده برّدت. لأ، ده مش بيبرد. كل اللي بيعمله إنه بينقل الحرارة من سطح المعالج للنحاس، والنحاس والشيلد هم اللي بيفرقوها على مساحة أوسع. نقل الحرارة هو الموضوع، مش المادة نفسها.