سؤال بيتكرر يوميًا: طاولة الصيانة مواصفاتها إيه وإيه أفضل المعدات؟ كل اللي تحت تجارب شخصية، ومن حقك يكون ليك تجربة غيرها.
الطاولة
- الخامة: أفضل خشب (الزجاج والسوكريت والرخام بيتكسروا وبيحصل من وراهم مشاكل). بلاش تدهن الخشب، الأفضل تلزقه فينيل.
- الارتفاع: في زمن الميكروسكوب والعدسة النص، لا يزيد عن 70 سنتيمتر. سيب المكاتب الجاهزة وهات نص لوح خشب وامسكه من أسفل بزوايا حديد.
- الكرسي: بمساند، ولا يشترط يكون متحرك.
الميكروسكوب
الميكروسكوب هو الأداة الأهم حاليًا في الصيانة، وأفضّله بصري مش ديجيتال. بعد تجربة عشرات الميكروسكوبات، الموديل والنوع ما لهمش قيمة على الإطلاق، ومصانع الميكروسكوبات في الصين معدودة والباقي بيحط لوجو بتاعه. وكل الميكروسكوبات رؤيتها بتبهت مع الوقت وبتحتاج تنضيف.
جرّب الميكروسكوب بنفسك قبل ما تشتريه بالعدسة النص وبدونها. فرق العدسات بالترتيب 0.3 و0.5 و0.7: كل ما الرقم يعلى الزووم بيزيد ومساحة العمل تحت الميكروسكوب بتقل. أنا شغال بالعدسة 0.5 طول الوقت، ومع الحفر والأماكن الدقيقة بخلعها خالص.
الهوت إير والكاوية
- الهوت إير: القدرة والثبات مهمين. الهواء الدوراني الناعم ممتاز للآيسيهات كبيرة الحجم (بيوفر عليك حركة إيدك وتوزيعة الهواء)، لكن عيبه إنه بيأثر على مساحة كبيرة من البوردة حتى مع خفض الهواء أو أصغر فوهة. فاختار حسب شغلك (معالجات وذواكر ولا سوكتات ومكونات).
- الكاوية للشغل اليومي: أي كاوية بتشغل سن C245 ممتازة لأن السن ده صعب جدًا يفقد حرارته.
- اللحامات الدقيقة: سنون C210 للمايكرو، وC115 للنانو. وركّب لها سنون من نوع كويس بدل اللي بتيجي معاها.
القياس والشحن
- الأفوميتر: اللي تدعمه برامج المخططات وبيقبل بطارية 9 فولت، ومعايرته قريبة من Fluke.
- الأوسيلوسكوب: أربع قنوات وبروتوكولات تواصل كتير.
- الباور سبلاي: ابعد عن اللي ملوش خاصية OCP تقدر توقفها لأنه هيرخم عليك في الحقن. وأفضل تتجنب باور سبلاي 3 أصفار 0:00.
- تيستر الشحن: اختار تيستر أربع أصفار 0.000 بدل صفرين. والتيستر الجيد بيفحص خطوط الداتا ومدة الشحن وسعة البطارية، ويحتاج رأس شاحن أصلية.
الشبلونة والقصدير والفلكس
- الشبلونة: لو شغال أيفون هتحتاج شبلونة لكل موديل (لكل معالج). لو أندرويد شبلونتين يونيفرسال عشان بيتهلكوا بسرعة، وشبلونة للذواكر. الشبلونات 4D بالقاعدة المغناطيسية ممتازة للمعالجات.
- القصدير السائل: اشتريه جديد لسه نازل، مش مركون عند تاجر. سوء التخزين أو الشحن بيأثر على الجودة، وترك العلبة مفتوحة بيدمره.
- الفلكس: كل ما لونه يميل للأبيض غير الشفاف، نسبة الجلسرين عالية، فدخانه أقل لكن تنظيفه متعب. كل ما كان شفاف أو مايل للأصفرار، ممتاز في اللحام، بس تجنب شم الدخان قدر المستطاع.
- الملقاط (الجفت): نقي السن من جوه، مبطط، من غير ما يخربش في الآيسي والمكونات. التيتانيوم سعر زيادة في الفاضي.
- السوائل: للتنظيف ثنر حار، اختبره على البوردة الأول لأنه ساعات بيجي مغشوش. للعزل أي UV Soldering Mask المهم الصلاحية وكشاف قوي.
- الشيلد (الفتيل): Soldering Wick أو Goot Wick. وسلك البريدجات يفضل معزول، 0.1 أو 0.02 حسب تحمل المسار للأمبير.