حالة من واحد من متدربينا لسه مخلص تدريبة احترافية من أسبوع تقريبًا. الشغل ده مش هيطلع غير لو اجتهد في التدريبة وركز في كل كلمة بتتشرح.
الجهاز Realme C25 بيسحب طبيعي على الباور سبلاي لحد 1100 مللي أمبير، بدون بيانات وبدون إضاءة.
اللي اتعمل بالترتيب
- جرّب شاشة بدون جدوى.
- رفع ممانعات كونكتور الشاشة وقارنها ببوردة سليمة، والممانعات سليمة.
- بدّل الكونكتور بدون نتيجة.
- قاس الجهود على كونكتور الشاشة: جهود باور الشاشة 5v و-5v موجودة، وجهود الإشارات 1.8 موجودة، وجهود الـ MIPI موجودة وتتراوح من 300 إلى 600 مللي فولت مقارنة بالبوردة السليمة. فولت الأنود موجود 4 فولت.
- رجع للملف وغيّره، نفس الجهود.
- غيّر آيسي الإضاءة بدون جدوى.
- فعّل الإضاءة يدويًا بتوصيل جهد 1.8 لرجل CABC، فاشتغلت الإضاءة لكن بدون بيانات.
فاتجه لآيسي البيانات. الممانعات حواليه سليمة. وهنا افتكر كلامي: ممكن آيسي البيانات (آيسي باور الشاشة) يقطع الجهاز إضاءة، والعكس. فكان لازم يغير الآيسي.
غيّره بآيسي من جهاز Infinix X559 وبفضل الله الجهاز اشتغل.
الملحوظة اللي تتحفظ
جهود باور الشاشة كانت موجودة فعلًا، لكن الآيسي كان بيبعت بيانات خاطئة للمعالج، فوقفت الإضاءة. يعني وجود الجهد مش دليل إن الآيسي سليم.