جالك جهاز شغال زي الفل طول ما هو على الشاحن، والبطارية بتشحن عشرة على عشرة، وأول ما تشيل الشاحن يرستر أو يقفل؟ أو جهاز عليه علامة شحن والبطارية مش بتزيد؟ قبل ما تتهم آيسي الشحن، تعالى نفهم الجهد بيعمل إيه أول ما يدخل من الشاحن.
ليه الـ 5 فولت مش بتدخل على طول تشحن؟
آيسي الشحن له حالتين: شغال من البطارية، أو شغال من الشاحن. ولما بطلب منه يحول مصدر الطاقة بينهم، لازم أنبهه الأول.
التنبيه ده بيتم بمقاومتين: ناخد من مسار الـ 5 فولت على المقاومة الأولى، والتانية متوصلة بالأرضي، ونطلع من المنتصف بمسار اسمه DET، اختصار Detect. المقاومتين دول دايرة تجزئة جهد، فالقيمة اللي بتوصل للآيسي بتكون بين 1.8 فولت و3.3 فولت حسب الدايرة. كأننا بنقول له: حس، الشاحن اتوصل. وساعتها يفتح البوابة بتاعته قدام الجهد والتيار.
الحماية حاجة والتأمين حاجة تانية
طب ما إحنا عملنا OVP وOCP، إيه تاني؟ دي حماية، لكن إحنا محتاجين تأمين، يعني نقطة رجوع للخلف.
افترض إن الدوائر شغالة من الشاحن وانت شيلته فجأة. البطارية موجودة آه، بس آيسي الشحن مش كون فيكون، محتاج ثانية أو ثانيتين عشان يستوعب إن المصدر اتغير ويشغل الدوائر من البطارية. تقدر تشوف ده بنفسك: لما توصل الشاحن علامة الشحن بتاخد لحظة، ولما تفصله العلامة بتفضل ثانية أو ثانيتين. الفترة دي مين هيغذي الدوائر؟
يعني إيه PMID؟
بعد ما البوابة تفتح، الجهد والتيار مش بيدخلوا الدايرة مباشرة، لكن بيروحوا الأول لمجموعة مكثفات اسمها PMID، وفي بعض الدوائر اسمها VMID، نفس المفهوم ونفس الوظيفة. اعتبرها بطاريات صغيرة جوه دائرة الشحن. آيسي الشحن فعليًا شغال من الخزنات دي، ومنها بيغذي جهد التغذية الرئيسي ويشحن البطارية.
طب الخزنات دي مش هتفضى؟ هات كباية واملاها مية، وبعدين فضل صب بالخرطوم. المية هتكمل طريقها، والكباية فاضل ملانة. كده المكثفات: طول ما الشاحن موصل هي مليانة واللي جاي بيعدي للآيسي. ولو حصل ضعف في التيار الجاي من بره، أو الشاحن اتشال، الآيسي يعتمد عليها لحد ما يتحول للبطارية.
وعددها مش ثابت: ممكن مكثف واحد، وممكن تلاتة، وممكن أكتر. الفكرة كلها إنها مجموعة خزنات.
إيه الأعطال اللي بتعملها مكثفات PMID؟
لو فيها شورت
الشورت على طرفي مكثف موصل توازي مع الأرضي معناه إن المسار كله بقى أرضي، والمسار ده أساسي لشغل آيسي الشحن. في بعض أنواع آيسيهات الشحن ده بيقطع الجهاز باور خالص، وعلى الباور سبلاي تلاقي سحب بسيط قبل ما تضغط على مفتاح الباور، واستجابة صغيرة لضغطة المفتاح. في الحالة دي مكثفات PMID لازم تدخل في قايمة الشك.
لو اتشالت أو فيها قطع
- ريستارت أو قطع باور مع فصل الشاحن: الجهاز شغال عادي على الشاحن، وشغال عادي على البطارية لو فتحته من مفتاح الباور، لكن لحظة شيل الشاحن يرستر أو يقفل.
- شحن وهمي: علامة الشحن موجودة، والجهاز بيسحب تيار ضعيف جدًا، والبطارية مش بتزيد. السبب إن الآيسي بيعتمد على الطاقة اللي في الخزنات، فلو شيلتها مش هيقدر يسحب غير شوية بسيطة.
- بعض آيسيهات الشحن مش هتسحب خالص، وتلاقي التستر صفر أمبير.
تحذير: لو لقيت مكثف PMID فيه شورت في دايرة فيها مكثف واحد، ماتشيلوش وترميه. لازم تجيب واحد بنفس السعة، وإلا هتقابل الأعطال اللي فوق دي عند الزبون.
رتب خطواتك
الجهد الداخل من الشاحن بيعدي على تلات مراحل قبل أي شحن: الحماية (OVP وOCP)، ثم الإحساس (DET)، ثم التخزين (PMID). ركز في مكثفات PMID كويس جدًا، لأن المكثفات دي لو مش موجودة أو فيها خلل ممكن تسبب مشاكل كتير.