حالة تسريب في تليفون نوكيا، وبشرح وفنيات أقوى من حالات كتير في أجهزة أعلى. بس مبدأنا الفهم أولًا فبنشتغل في أي حاجة.
الحالة
- الجهاز قاطع باور.
- السحب على الباور سبلاي 0.000 A قبل الضغط، وبعدم استجابة لضغط زر الباور.
- ممانعة كونكتور البطارية:
ممانعة كونكتور البطارية112 (الطبيعي 500 تزيد أو تقل)
إذن عندنا تسريب جزئي على مسار البطارية Vbatt. بس إزاي تسريب جزئي والسحب أصفار؟ فعلًا حالة صعبة، وحلها حقن عكسي.
محظورات الحقن العكسي
- لو فيه آيسي شحن وآيسي باور راكبين (في أي جهاز تاني، مش شرط حالتنا) شيلهم برة، وممكن تكتفي بآيسي الشحن لو مسار البطارية مش واصل لآيسي الباور. ليه؟ لأن الآيسي أشباه الموصلات فيه توصيلها عكسي من ناحية الأرضي، فهيستهلك تيار الحقن حتى لو مافيهوش مشاكل. وبعدها تعيد القياس، عشان لو كان الآيسي سبب المشكلة تبقى اتأكدت.
- لو على المسار دايود OVP اخلعه. لأنه هيمرر التيار من الأرضي أثناء الحقن، فهيحصل عليه تساقط في الجهد وهيسخن وهو مالوش ذنب.
- لو على المسار مكون توالي تجاهله، لأن التسريب يضر ما قبله.
- توصيل الباور سبلاي: موجب الباور سبلاي على أرضي البوردة (وليس أرضي الكونكتور بسبب وجود مقاومة iSense المسؤولة عن تحديد تيار البطارية)، وسالب الباور سبلاي على موجب المسار، وهو في حالتنا Vbatt.
هيبدأ يسحب معاك تيار على الباور سبلاي. ولو السحب تحت 200 مللي أمبير، للأسف محتاج كاميرا حرارية. وبفضل الله تم التوصل للمكثف صاحب التسريب.
الخلاصة
- الفاهم بيريح.
- حتى لو عندك كاميرا حرارية، مش هتعرف توصل من غير فهم.
- الإلكترونيات هي العشق، أيًا كان نوع الجهاز أو قيمته.