الموبايل بيسخن والبطارية بتخلص في مكان مفيهوش شبكة: ليه، وتعمل إيه؟

فيه غلطة بنغلطها كلنا، بتستهلك البطارية وبتسخن الموبايل، والأخطر إنها ممكن تدمر دايرة الشبكة.

إزاي تشوف الكلام ده بعينك؟

افتح الإعدادات وادخل على Battery، هيجيبلك التطبيقات اللي بتستهلك الطاقة. في الموبايل اللي معايا ظهر سطر اسمه No Cell Coverage وواخد 13%، زيه زي أي تطبيق. يعني عدم وجود تغطية.

معنى كده إن عدم وجود شبكة في المكان اللي أنت قاعد فيه بيخلي الموبايل يصرف جزء كبير من طاقته في البحث عن الشبكة.

الطاقة دي بتروح فين؟

عندنا قانون بقاء الطاقة: الطاقة لا تفنى ولا تُستحدث، بتتحول من صورة لصورة. فالطاقة اللي راحت في البحث عن الشبكة ليها تلات مخارج:

1. حرارة.
2. تقليل العمر الافتراضي للبطارية.
3. تلف الآيسيهات الخاصة بدايرة الشبكة.

وطبعًا ده مش بيحصل من أول يوم. بيحصل لو أنت قاعد طول الوقت في مكان مفيهوش شبكة.

الحل إيه؟

لو بيتك حرفيًا مفيهوش شبكة: أول ما تدخل، اقلب الموبايل على وضع الطيران، وبعدها شغّل الواي فاي. كده أنت متصل بالإنترنت وبتقضي شغلك، من غير حمل زيادة لا على الموبايل ولا على دايرة الشبكة.