وانا بقرا لوج معالج ميدياتك في Samsung A125، الجهاز كان بيسحب على الباور سبلاي 190 مللي أمبير ويرجع للصفر. السحبة دي معناها إنك عديت مرحلة تغذيات الذاكرة وممكن تكون دلوقتي في مرحلة الرام.
اللوج بيقول إيه؟
دورت في اللوج على الخطأ وادّيته للذكاء الاصطناعي، وقفش خطأ في السطور اللي ظللتها بالأحمر. معناه: فيه آيسي اسمه FAN53526 مش بيستجيب للتواصل مع المعالج، وفيه جهدين مفقودين لعدم وجوده، وهما VDD2 وVDDQ.
جريت على البوردة والمخطط ألاقي آيسي بالاسم ده... مفيش. المعالج مش هيكدب، فرحت دورت على الـ Part Number بتاعه وطلع موجود في كام جهاز موتورولا وكام جهاز شاومي، منهم Mi 9 Lite. فتحت مخططه وطلع دايرة BUCK SW (دايرة بتنزّل الجهد) وموجودة في البوردة مرتين، ومرة منهم مسؤولة عن تغذية الرام، رغم إن معالج الشاومي كوالكوم.
رجعت للسامسونج لقيت الرام فيه فعلاً بتتغذى بدايرة BUCK SW، وآيسي بنفس عدد الرجول ونفس الشكل لكن باسم تاني: HL7593، وبيخرج نفس قيمة الجهد 1.125 فولت. غيّرته: نفس السحبة. قلت يمكن الآيسي التاني اللي بيخرج 0.6 فولت، غيّرته: نفس السحبة. قست VDD2 وVDDQ: موجودين وتمام.
الحل كان في أول سطر
رجعت أقرا اللوج نفسه وافهمه، وتفاجأت إن الآيسي التاني HL7593 مذكور برضه، والمعالج بيقول إنه شغال بكفاءة وبيخرج جهوده. ليه المعالج بيذكر نفس الآيسي مرتين بأسمين مختلفين؟ الإجابة كانت في أول سطر في اللوج:
Preloader Start=0
السطر ده علمني حاجات مهمة لو عايز تنجح في قراءة اللوج:
- بعض المعالجات تحتاج الدخول في وضع المعالج لقراءة اللوج بتاعها.
- ملف الـ Preloader المشهور لمعالجات ميدياتك بيتكتب منه نسخة على المعالج.
- الذواكر المتوافقة مع معالجات ميدياتك ممكن تستنتجها من ملف الـ Preloader. ومش بس الذواكر، الملف كمان بيذكر بدائل الآيسيهات اللي بتقوم بنفس الوظيفة مع نفس المعالج. فالآيسيين اللي فوق بيقوموا بنفس الوظيفة، وفي بداية الإقلاع المعالج بيدور على الاتنين، ولو لقى واحد منهم بيفحص إنتاجه، ولو غاب الأول فالتاني بيقوم بوظيفته.
- ممكن تركّب آيسي بنفس عدد الرجول ونفس الوظيفة باسم مختلف ويشتغل بكفاءة، والعكس صحيح: لازم يكون مسجل لدى المعالج.
- معالج ميدياتك ممكن مايقراش آيسي ركّبته، ويفضل العطل قائم لحد ما تعمل سوفت وير لتحديث ملف الـ Preloader، زي أجهزة الآيفون لما تشتغل في آيسي معالج الشبكة (البيزباند).
- نتايج اللوج مينفعش تعتمد فيها على الذكاء الاصطناعي بس. من غير معرفة كاملة بالمخططات وبعض معرفة بالسوفت وأسلوب عمل المنظومة مش هتوصل لنتايج دقيقة.