واحد سأل في اللقاء الأسبوعي: لو عايز أغير ذاكرة لموبايل معين، أعرف توافقيات الذاكرة بتاعته إزاي؟ يعني إيه الأنواع اللي الجهاز ده هيقبلها وتشتغل عليه؟
بدايل الذاكرة متخزنة فين؟
في أجهزة ميدياتك، بتبقى متخزنة في ملف اسمه Preloader. يعني الإجابة جوه السوفت وير بتاع الجهاز نفسه، وأنت بس محتاج تطلعها، وعندك كذا طريق.
من بوكس الذاكرة نفسه
- من ملف الدمب: بعد ما تحمل ملف الدمب بتاعك في البوكس، توافقيات الذاكرة بتظهر معاك في السجل.
- من واجهة الفلاش: حسب البوكس اللي معاك. في واجهة UFI مثلًا تختار فوق إنك هتفلش معالج ميديا تيك، وأول ما تحمل ملف الـ Scatter تظهرلك بدايل الذاكرة.
من برنامج MTK Preloader eMMC
ده برنامج صغير واجهته بسيطة جدًا، خاص بالـ Preloader بس:
- افتح البرنامج واضغط Browse.
- اختار المكان اللي منزل أو ساحب فيه الفلاشة.
- لو الفلاشة Scatter، اختار ملف الـ Preloader نفسه.
- هتلاقي أنواع الذواكر اتعرضت في قايمة.
تحذير: خد بالك من صيغة السحب: في الميدياتك يفضل تكون ساحب الفلاشة بصيغة BIN، وتقدر تعمل ده بأي بوكس من بتاع الذواكر الداخلية.
هقرا القايمة دي إزاي؟
كل سطر في القايمة بيقولك نوع الذاكرة، سامسونج مثلًا، ومعاه اسمها. الاسم ده هو الـ Part Number اللي بيبقى مكتوب على الذاكرة نفسها. فتطابق اللي معاك باللي في القايمة.
أختار أنهي نوع؟
لو الجهاز اللي بتغيرله الذاكرة مدعوم إنه يركب ذاكرة سامسونج، ركّبله سامسونج. دي الأفضل في الأنواع.