بوردة جاتلك وقعت في سائل والأكسدة واضحة عليها. تحطها في الغسالة على طول؟ لأ، فيه مرحلة قبلها الناس بتستهون بيها. تعالى نشوف ليه.
ليه فيري مش بريل؟
أحسن حاجة شوية فيري مع مية على فرشة. ليه؟ أولا لأن البريل مقطع، وتانيا لأن الفيري أقوى شوية. كل ده هدفه يفك طبقة الأكسدة من على البوردة قبل أي حاجة تانية.
هل المية هتبوظ البوردة؟
واحد هيقولي: يا عم إنت بتحط بوردة تحت الحنفية؟ طب إنت أصلا بتتعامل مع بوردة وقعت في مية، وهتفك شيلد وتغرق إيسيهات، الفرق إيه؟ احسبها: اللي هتدفعه في مية وصابون ولا حاجة قدام اللي هتكسبه من الحالة.
خطوات الغسيل بالترتيب
- ادعك البوردة كلها بالفرشة والصابون.
- اشطفها بالصابون الأول، وبعدين تحت مية جارية.
- بص تحت الحماية اللي ناحية المعالج من الزوايا. لو مالقيتش أثر مية، مش محتاج تشيلها.
- دخلها الغسالة الألترا سونيك 5 دقايق على كل وش بسائل التنر.
وليه التنر بعد المية؟ لأنه بيسحب آثار المية دي كلها، وبتطلع البوردة كأنها ماوقعتش في مية أصلا. وخد بالك إن نضافة ما تحت الحماية من الزوايا ماتمنعش إنك ممكن تتفاجئ بتسريب تحته بعد كده.
إزاي الفني اللي قبلك يتوه في مكان التسريب؟
البوردة دي نفسها كان فيها تسريب حوالي 1.7 أمبير على الباور سبلاي. اللي قبلنا كان بيحقن على VBAT، فإيسي الشحن سخن معاه. راح رافع الاستيكر من فوق الإيسي الرئيسي ومعتقد إن العيب فيه.
لما قسنا ممانعة VBAT لقيناها 500 وحاجة، ولما حقنا كان مصدر الحرارة جاي من تحت حماية الإيسي الرئيسي. رفعناها، ولقينا تحتها أكسدة جامدة. يعني البوردة دي واقعة في سائل.
القاعدة: لو شفت أكسدة، نضف الأول وبعدين احكم. ولو حد سبقك، اعتبر استنتاجاته مش موجودة، وقيس بنفسك.