الجهاز ده اشتغلنا فيه حوالي شهرين. وصل ايفون XS Max فاصل باور، والبوردة مسخن عليها بهوت اير من فني تاني.
التشخيص ورا الأعطال
- التشخيص المبدئي: سحب عالي مع ثبات قبل الضغط على مفتاح الباور. يعني شورت على خرج دايرة تضخيم.
- قست ممانعات كل كونكتورات البوردة وطلعت سليمة.
- اضطريت أفصل البوردتين (العلوية والسفلية). البوردة العلوية اشتغلت طبيعي، يبقى الشورت في البوردة السفلية.
- بالفحص ماكنتش دايرة تضخيم، كان مسار VDD_MAIN. وهنا السؤال: إزاي شورت على مسار التغذية الرئيسي وما سحبش الأمبير كله من الباور سبلاي؟
- حقنت في المسار ووصلت للمكثف اللي فيه الشورت. الجهاز اشتغل.
تحذير: لما تحقن في ايفون 8 وأحدث، بلاش الشورت كيلر.
وبعدين وقف اللمس
قفلنا البوردتين، والجهاز شغال بس اللمس واقف. الممانعات تمام، الفولتات تمام، وجربنا شاشة تانية. نفس الحال. غيرنا البوردة السفلية الخاصة بكونكتور اللمس، والجهاز وقف على الشعار وعمل ريستارت.
ظهرت سخونة ناحية البيزباند، فرفعناه وقسنا ممانعات وكلها فل. شبلنا الآيسي (الشبلنة يعني إعادة كور اللحام بالاستنسل) ونزلناه، ولسه في حاجة غلط. رفعنا باور البيزباند وقسنا ممانعات، وطلع العيب من بوردة اللمس الصغيرة اللي عليها آيسيهات تابعة للشبكة. اتظبط العيب، والجهاز اشتغل بس اللمس لسه واقف، وفضلنا وراه لحد ما لقطنا المشكلة واتحلت.
وخد بالك: البوردتين اتفصلوا واتشبلنوا واتقفلوا أكتر من 30 مرة.
الخلاصة
- ماتيأسش، افضل وراه.
- جالك ايفون حديث وماعندكش المعدات اللازمة؟ ماتهبدش.
- راجع قياساتك تاني وافهم الدوائر صح.
- لو هتشتغل ايفون X وأحدث اشتري ام تيستر عشان ماتتعبش بالشبلنة والتقفيل كل مرة بتجرب.