دخل علينا آيفون Xs Max فيه مشكلة صوت. وقبلها بيوم واحد بس كنا شارحين بروتوكولات التواصل ومنها I2S. الخلاصة إنك تبقى فاهم، فيه ناس هتحفظك القطع والأعطال لكن للفهم مدرسة.
الخطوة الأولى: نحدد المشكلة
- الجهاز واقف كل الأصوات في المكالمة: سماعة وميكروفون وسبيكر (مع إن مفتاح السبيكر بيتفتح ويتقفل وما بيختفيش).
- جربنا الأصوات في باقي الوظائف: تسجيل صوت وتصوير فيديو بالكاميرا الأمامية والخلفية، وكلها شغالة تمام.
تحليل العطل
الـ I2S هو بروتوكول تواصل خاص بإشارة الصوت بعد ما اتحولت في الـ A/D converter (المحول من أنالوج لديجيتال) جوه آيسي الصوت، وده اللي بيفهمه المعالج (Digital). والمستهدف هنا لازم يكون معالج الشبكة (Baseband).
رد الطلاب: مشكلتنا في مسارات I2S بين آيسي الصوت ومعالج الشبكة. هنا لفت نظرهم لعدم الحفظ: طب يلا نفتح مخطط ونحدد المسارات.
- اخترنا آيسي الصوت، صفحة الـ I/O، وندور على مسارات I2S بينه وبين معالج الشبكة. مفيش!
- رحنا من الناحية التانية وفتحنا صفحة معالج الشبكة. المسارات موجودة، لكن جاية من معالج التطبيقات مش من آيسي الصوت.
- يعني آيسي الصوت بيمرر I2S لمعالج التطبيقات، ومنه لمعالج الشبكة أثناء المكالمة.
حددنا الرجول بالورقة والقلم، بأسماء المسارات والنقاط على أسورة التوصيل بين البوردتين. كده فهمنا العطل من قبل ما نفك الجهاز.
خطوات الإصلاح
- محاولة يائسة لتسخين البوردتين (خلخلة).
- فصل البوردتين.
- قياس الممانعات على النقاط المستهدفة على البوردتين: سليمة.
- إعادة شبلنة البوردتين.
وانحل العطل. الفكرة هنا مش إن الحل سهل، الفكرة إنك تكون فاهم إنت بتفك الجهاز وراح تعمل إيه.