إشارة i2c بتيجي لحظة وتختفي، فلو وقفت بالـ Probe وبصيت على الشاشة ممكن ماتشوفش حاجة وتقول المسار ميت. طب الصح إيه؟ تعالى نمشيها خطوة خطوة.
هتمسك الإشارة منين؟
أسهل نقطة هي مقاومات الـ Pull-up، ودي المقاومات اللي بترفع خطوط SCL و SDA على 1.8 فولت. لحم سلك رفيع جدا على طرف المقاومة، واعمل في آخره كورة لحام صغيرة تمسك عليها.
تحذير: ماتلمسش بسن الـ Probe على القطعة. السن مطلي، ولو اتخدش أو لمس قصدير القراية بتتشوه. امسك بالكليب على السلك.
- الكليب الأرضي على أرضي البوردة، وأرضي كويس هو مفتاح القراية كلها.
- عارف إيه قناة SCL وإيه قناة SDA، عشان ماتتلخبطش.
- بعد الباور اتأكد إن الخط طالع 1.8 فولت.
ليه الإشارة مش بتثبت على الشاشة؟
لأن وضع Auto بيخلي الشاشة ترسم على طول، فالإشارة تعدي وتجري. الحل في الـ Trigger: خليه Pulse لأن i2c عبارة عن نبضات، وخلي الـ Sweep على Normal عشان يحاول يمسك عينات من الإشارة ويعرضها.
ولما تحب تاخد عينة واحدة وتثبتها، استخدم Single. بياخد لقطة ويقف. ولو الدنيا هنجت، اضغط Run/Stop.
ليه مش شايف i2c التاتش وأنا الجهاز شغال؟
خد بالك من وضع السكون. الجهاز لو نايم، إشارة التاتش ممكن ماتظهرش أصلا، فاضغط باور أو طلع البوردة من وضع السليب عشان يبقى فيه كلام على الخط.
محتاج Trigger i2c في الجهاز؟
بعض الأجهزة فيها Trigger مخصوص لـ i2c، وبعضها بيعمل Decode ويكتب لك البيانات على الشاشة. حلو لو موجود، بس مش شرط. الـ Pulse ليه ميزة: بيمسك من القناة الأولى حتى لو القناة التانية مفصولة، فمش هتتعطل. ماتعتبرش غياب الخاصية دي مشكلة.
الخلاصة: توصيل نضيف، أرضي صح، Trigger على Pulse و Normal، وصبر لحد ما الجهاز يتكلم.