عايز تكتشف المكون اللي عامل تسريب أقل من 200 مللي أمبير، قبل ما تضغط باور؟ الطريقة دي من أذكى الحيل في صيانة المحمول، وصاحبها المهندس الكبير مصطفى حداد رحمه الله. علم ناس كتير، ولسه طريقته شغالة لحد النهاردة بكل كفاءة.
الفكرة ببساطة: لو فيه تسريب بسيط في البوردة ومش قادر تحدد الآيسي المتسبب، استخدم حرارة الكاوية لصالحك.
الخطوات
- وصل البوردة على الباور سبلاي.
- خد كاوية بسن عريض، واظبطها على حرارة ما تتعداش 200 درجة.
- وقف سن الكاوية بلطف فوق الآيسي، من غير ضغط نهائيًا، بس سيبه ياخد شوية حرارة.
- راقب قراءة الأمبير على الباور سبلاي.
حرارة الكاويةما تتعداش 200 درجة
لو لقيت قراءة الأمبير زادت وقت ملامسة الكاوية، فغالبًا الآيسي ده هو اللي فيه المشكلة، أو واحد من المسارات على خرجه فيه شورت.
ليه بيحصل كده؟
لأن الحرارة بترفع التوصيلية الكهربية في أشباه الموصلات، فالآيسي اللي فيه خلل هيبدأ يسحب تيار أعلى بمجرد ما يسخن.
ملاحظات مهمة جدًا
تحذير: إياك والضغط على الآيسي. مجرد التلامس كفاية، ولو إيدك حساسة سيب بس صهد الكاوية عليه من غير تلامس مباشر.
تحذير: خلي بالك وانت شغال: لو الكاوية لمست مكون تاني بالغلط، خصوصًا وانت موصل باور سبلاي، ممكن تعمل شورت وتبهدل البوردة.
ولو حصل فعلًا ارتفاع في الأمبير، لازم تقيس أسفل الآيسي، لأن ساعات المشكلة بتكون في خرج الآيسي مش الآيسي نفسه.