جهاز صيني فاصل باور ومالوش مخطط. على الباور سبلاي بيسحب 64 ملي أمبير قبل ما تضغط على زر الباور، والرقم ثابت، ولما ضغطت مفيش أي استجابة. طب تبدأ منين وإنت ماعندكش ورقة واحدة؟
السحب ده بيقولك إيه؟
سحب منخفض وثابت قبل الباور، ومعاه عدم استجابة للزر، تحليله إن فيه شورت أو تسريب على VPH، وده مسار جهد التغذية الرئيسي. الخطوة الجاية ممانعة VPH.
ممانعة VPH111 أول مرة، و 200 تاني مرة، والسليمة من 300 إلى 350
يبقى الممانعة متدنية، والتوجه ناحية الشورت صح. بس ماتنزلش على إيسي لسه. فيه مسارين قريبين لازم تطمن عليهم، زي Anode الإضاءة. قسته لقيته 360. الرقم ده عالي على VPH، بس ده طبيعي لأن الأنود أعلى من VPH بحوالي 100 إلى 150 بسبب الملف والدايود اللي بينهم. يبقى مسار الإضاءة مالوش دعوة.
إزاي تطلع إيسي الشحن من الشك من غير مخطط؟
إيسي الشحن هو الموصل بين VBAT و VPH. عشان كده رفعته الأول، وهو BQ تعرف شكله من نمط رجوله. وطالما هو برا، VBAT هيسحب صفر، فحقنت مباشرة على VPH: الموجب على المكثف اللي جنب ملف LX، والسالب على أرضي البوردة.
النتيجة نفس الـ 64 ملي أمبير. يبقى إيسي الشحن بريء، والتسريب في مكان تاني على الخط.
الحقن العكسي ولا تفك إيسي الباور؟
هنا فيه احتمالين: يا تسريب جزئي على VPH، يا مشكلة في إيسي الباور. التسريب الجزئي محتاج حاجة من اتنين: كاميرا حرارية، أو الحقن العكسي، وده آخر حل عندنا، لأن لو فيه إيسي فيه Direct OCP، يعني أحمال للطيار العالي، الإيسي ده ممكن يطير.
تحذير: الحقن العكسي آخر حل مش أول حل. أي إيسي فيه Direct OCP ممكن يطير منه.
القرار كان إني أرفع إيسي الباور الأساسي قبل ما ألجأ للحقن العكسي. بعد الرفع ممانعة VPH طلعت حوالي 500، والرقم عالي لأن إيسي الشحن كمان برا، والممانعة أصلا بتتكون من خلال أشباه الموصلات اللي على الخط. وعلى الحقن السحب بقى صفر. غيرنا إيسي الباور، والجهاز اشتغل.
الدرس: عدم وجود مخطط مش معناه تخمين. سحب وممانعة وبعدين استبعاد واحد ورا التاني، وكل خطوة بتشيل متهم. تحفظ شكل القطع على البوردة، وتعرف الموصل بين كل خط والتاني، وتحقن في المكان اللي مش هيعدي على متهم تاني.