جالك زبون بيشتكي إن موبايله بيشحن بطيء. وصلته على التستر لقيته بيسحب 600 مللي أمبير بس، والجهاز شغال. هتفحص دائرة الشحن كلها؟ لأ. تعالى نفهم الرقم ده جاي منين.
إيه هي سلالم التستر في الشحن العادي؟
| القراءة على التستر | إيه اللي بيحصل |
|---|---|
| صفر | أول سلمة، قبل ما المعالج يفتح |
| 0.090 (90 مللي) | المعالج فتح، وفي أجهزة Type-C تروح لحد 280 مللي |
| من 400 لـ 600 مللي | المعالج اتأكد إن ID حالتها High، وطلب أقل حد آمن |
| 800 مللي وانت طالع | المعالج عرف إن اللي راكب شاحن، وبدأ الشحن العادي |
ليه المعالج بيبدأ بأقل قيمة؟
بعد ما يتأكد من ID، المعالج لسه محتار: شاحن ولا وصلة USB؟ الفرق كبير. راس الشحن العادي يقدر يديك لحد 2.4 أمبير، أما منفذ USB بتاع الكمبيوتر فآخره 0.6 أمبير.
فالشركات بتفاضل دايمًا على الحد الأدنى. المعالج يقول لآيسي الشحن عن طريق I2C: اسحب من 400 لـ 600 مللي. أولًا لأن البطارية لو ميتة خالص مش هينفع ندخل عليها بقيمة كبيرة، محتاجة تيار بسيط الأول. وتانيًا لأن آيسي الباور بدأ يغذي دوائر تانية ومحتاجين شوية تيار أعلى.
المعالج بيعرف إزاي ده شاحن ولا كمبيوتر؟
الإجابة مكتوبة في ملفات الإقلاع اللي بيجيبها من الذاكرة. عشان كده المرحلة دي دخلت معانا المعالج والذاكرة والرام. جوه الملفات شرط مهم:
- مفيش أي ترابط بين D موجب وD سالب: ده وسيط USB، وهيتم نقل بيانات.
- الاتنين مقفولين على بعض: ده شاحن، لأنه مش محتاج خطوط البيانات.
منطقي. الكمبيوتر محتاج المسارين منفصلين عشان يتواصل، والشاحن العادي مالوش حاجة بيهم، فبيعمل قفلة بينهم. القفلة دي بتفهم المعالج إن ده شاحن، فيبدأ يسحب أعلى من أول 800 مللي أمبير وانت طالع.
الجهاز واقف عند 600 مللي: العيب فين؟
هنا لازم تسأل سؤال واحد: الجهاز شغال ولا قاطع باور؟
- شغال وبيسحب 600 مللي بس: المعالج ماقدرش يحدد حالة مسارات البيانات. مش محتاج تفحص الدايرة كلها، افحص D موجب وD سالب بس. والمسارين دول ممانعتهم متطابقة، فقيس ممانعة الاتنين وقارن.
- قاطع باور وبيسحب 600 مللي: مالكش علاقة بدائرة الشحن. المشكلة يا شورت على خرج آيسي الباور، يا في المعالج أو الذاكرة أو الرام. وده بيظهر كتير في أجهزة الريبولينج.
طلع لفوق وبعد ثانيتين رجع صفر؟
ممكن الجهاز يوصل لـ 600 أو 800 مللي أو أمبير، وبعد ثانيتين تلاتة ينزل للصفر. معناها إننا بعد ما بدأنا الشحن اكتشفنا حاجة في البطارية: حرارتها مرتفعة، أو إنها مش بتاعة الجهاز أصلًا. هنا تدخل آخر مجموعة نقاط في دائرة الشحن:
- حرارة البطارية: مسار Therm.
- تعريف البطارية: BSI أو Bat ID.
- أمر تشغيل البطارية: مسار Bat ON.
- جهد البطارية: مسار V-Sense، مقاومتين تجزئة جهد بيطلع من وسطهم المسار.
- تيار البطارية: مقاومة I-Sense الكبيرة اللي غالبًا لونها أبيض ورا كونكتور البطارية، توالي على الأرضي أو على VBAT.
طب ليه محتاجين V-Sense وI-Sense مع بعض؟ لأن بطارية منفوخة ممكن تقيسها وتلاقي جهدها موجود، وبرضو مش بتشحن، لأن مشكلتها في التيار. الخلاصة: الرقم اللي على التستر بيقول لك انت واقف على أنهي سلمة، فافحص السلمة دي بس.