جالك جهاز شاومي بيسحب لحد 200 مللي أمبير ويرجع للصفر على التيستر؟ جرّب الأول يشتغل ولا لأ على الباور سبلاي. لو شغال كده يبقى مشكلة شحن. بس أغلب شاومي الحديث بيرفض الإقلاع على الباور سبلاي بالموجب والسالب بس، فهتقف عند نفس التحمل 200 مللي أمبير، وتفتكرها مشكلة معالج أو رام أو ذاكرة.
ساعتها روح على Batt Therm
روح على مقاومة الـ Batt Therm: يا إما طايرة، يا إما الجهد مش واصلها، يا إما تالفة.
وممكن حد يقول: أجرب Test Point، ولو اتعرف على الكمبيوتر أكمل. لو فيه مشكلة في Batt Therm غالبًا هيتعرف على الكمبيوتر معاك، لأن لوج أغلب بوكسات السوفت وير حديثًا بيطلب من المعالج بيانات الإمداد بالطاقة من وصلة USB، ومالهمش علاقة بالبطارية أصلًا.
حالة Mi 11T 5G
في الجهاز ده مقاومة الـ Batt Therm قيمتها 100 أوم فقط. وخد بالك وانت بتفصل كونكتور البطارية: المقاومة فوق الكونكتور عدل ومش باينة، وممكن تطيّرها بالضافر أو الفتاحة وانت شغال ومش هتاخد بالك.
مش مرتبط بنوع المعالج
نفس الحركة بتحصل في Poco X3 Pro ومعالجه Qualcomm، في حين إن الجهاز اللي قابلني معالجه MediaTek. فالموضوع مالوش علاقة بنوع المعالج.