ليه تفتح جهاز تلاقي فيه آيسيهين شحن؟ وهل ده هيفرق معاك في تحديد الأعطال؟ تعالى أحكيلك قصة الشحن في سامسونج SM-A155F. بس عشان تفهم اللي بقوله، افتح مخطط الجهاز (Schematic)، يعني الرسم الكهربي للبوردة، وتابع معايا خطوة بخطوة.
التفاوض: عادي ولا سريع؟
الجهاز بيدعم نوعين من الشحن: العادي والسريع. وعشان يتم التمييز بينهم، في أغلب الهواتف بيتفاوض المعالج أو اللي ينوب عنه من آيسيهات USB. وهنا الـ USB مدمج مع آيسي الشحن الأساسي U6001 (IF-Pmic).
عشان تتأكد بنفسك، تتبع مسارات Data P,M: لو لقيتها داخلة لآيسي الشحن على رجل معينة وخارجة من رجل تانية متجهة للمعالج، يبقى آيسي USB مدمج جوه آيسي الشحن الأساسي.
ومعلومة جميلة كمان: الرجول المسؤولة عن التفاوض بتختلف حسب البروتوكول:
| البروتوكول | رجول التفاوض |
|---|---|
| PD | CC1 , CC2 |
| QC | DP , DM |
كده من قبل ما نشرح باقي الدائرة، قدرت تقف على أول سبب لدعم الجهاز للشحن العادي من غير السريع، والعكس صحيح.
مراحل البطارية، وتشك في إيه في كل مرحلة
1. التهيئة (Pre-Charge initialization)
لو البطارية شبه فاضية، الآيسي الأساسي U6001 يبدأ يشحنها بتيار منخفض، ويفحص حالتها باستمرار عبر مسارات Batid وVbat_Sense.
جهد البطارية في التهيئة وتيار الشحنأقل من 3 فولت، بتيار 100-500 mA
بعد ما الجهد يوصل لأعلى من 3 فولت، يقرر هل من الأمان يكمل الشحن ولا يوقفه، في حالة تلف البطارية أو الحرارة العالية. يعني السحبات دي على التيستر بيتدخل فيها آيسي الشحن لو كان فيه منظومة الـ USB.
2. بداية الشحن العادي أو السريع
لو التفاوض نجح بين U6001 وأدابتر الشحن، بيبلغ المعالج بالتفاصيل دي، فيتفعل آيسي الشحن المباشر U6002 (Direct Current)، ويعدي تيار عالي ثابت للبطارية عشان يشحنها بسرعة عالية لحد 80%، وبعدين الشحن السريع يقف، مع مراقبة حرارة البطارية طول الوقت.
Warning: لو الجهاز وقف على الشاحن بنسبة أقل من 70%: راجع مسارات مراقبة جهد وتيار البطارية، ومسارات مراقبة حرارة البطارية.
3. الوصول لـ 80%
U6002 بيتحول لمرحلة الجهد الثابت، فيقف عند 4.2 فولت، ويقلل التيار تدريجيًا لحد ما البطارية توصل 100%.
Warning: لو البطارية وقفت شحن بعد ما وصلت 80%: شكك يتحول للبطارية نفسها بشكل أساسي، لأنها في الحالة دي وصلت للجهد الأقصى 4.2 فولت قبل ما خلاياها تكمل شحن بالتيار.
4. الشاحن لسه موصل بعد 100%
U6002 بيتفصل عن الخدمة مؤقتًا، والمنظومة تكتفي بتمرير الجهد والتيار عبر U6001 لجهد التغذية الرئيسي عشان تشغل الدوائر على الشاحن، مع استمرار مراقبة البطارية، ولو نزلت يمدها بتيار يرجعها لـ 100%.
هنا تقدر تراقب التيستر بعد اكتمال الشحن. لو لسه فيه سحب تيار عالي، يبقى عندك مشكلة من اتنين: البطارية نفسها مش بتوصل لحالة التشبع، أو فيه تسريب في البوردة.
كل ده في حالة الشحن السريع بس، ولما التفاوض مع الأدابتر ينجح.
طب ليه محتاج تفهم الكلام ده؟
- الزبون النهاردة بقى فاهم، وبيدخل يقولك جهازي مش بيشحن سريع، وانت محتاج تتمرس في أعطال الشحن السريع.
- دي أبسط منظومة شحن سريع. فيه منظومات بتوصل لـ 7 و 8 آيسيهات.
- لازم تفهم أهمية التيستر في محلك ومراقبته عشان تحلل الأعطال.