يعني إيه عطل ارتفاع درجة الحرارة أو انخفاضها؟ هي مجرد مقاومة نشيلها أو نبدلها؟ وهل الآيسي المسؤول عن إدارة الحرارة دايمًا واحد؟ تعالى نفهم الأول دايرة المقاومة الحرارية.
الفكرة: مقسّم الجهد (Voltage Divider)
الدايرة معتمدة على دايرة بسيطة اسمها مقسّم الجهد، وليها أربع عوامل: Vin جهد الدخل (أو جهد المصدر)، وVout جهد الخرج (منه بنستشعر تغير الحرارة)، والمقاومة الأولى R1، والمقاومة التانية R2.
معادلة مقسّم الجهدVout = (Vin × R2) / (R1 + R2)
يعني قيمة Vout بتتغير مع تغير أي عامل من التلاتة التانيين. ولاستخدام الدايرة دي في الإحساس بالحرارة، المصممين غالبًا بيثبتوا جهد الدخل على 1.8 فولت، وبيثبتوا واحدة من المقاومتين (R1 مثلاً). فالباقي R2، والمصمم بيحطها مقاومة متغيرة: قيمتها بالأوم بتتغير حسب درجة الحرارة، وده اسمها مقاومة حرارية (Thermistor).
وخد بالك: اختصاراتها كتير في المخطط، زي Ntc وBtc وTh وTherm وRt وRtherm، وساعات يسميها R بس.
ليه المقاومة الحرارية لوحدها مش كفاية؟
أغلب برامج المخططات بتختزل العطل في المقاومة الحرارية بس. طب جالك جهاز غيّرت المقاومة ورجعت طيّرتها وطيّرت انت كمان وراها وماتحلش العطل؟ ده لأن العيب في المنظومة كلها.
جرّب بنفسك: افتح جوجل واكتب Voltage divider Calculator والعب في المتغيرات. لو المقاومة الثابتة R1 اتلفت، جهد الخرج هيتغير والآيسي هيحس بارتفاع أو انخفاض حرارة. وكذلك لو جهد الدخل Vin انقطع أو اتأثر بشورت على المسار. فالعوامل المؤثرة:
- قيمة المقاومة الحرارية.
- قيمة المقاومة الثابتة.
- قيمة جهد الدخل.
- ممانعات تلات نقط على المنظومة.
- الآيسي المستشعر للحرارة.
والآيسي مرات تلاقيه آيسي الباور، ومرات المعالج، ومرات آيسي الشحن، ومرات اتنين منهم مع بعض.
طب لو لقيت مقاومة واحدة بس على البوردة؟
- لو على المسار مقاومة واحدة توازي مع الأرضي، يبقى باقي المنظومة جوه الآيسي، وممكن الآيسي نفسه يسبب عطل الحرارة (أغلب البرامج مبتهتمش بالمقاومة دي لو لقيتها لوحدها).
- لو المقاومة الموجودة توالي وباقي المسار رايح لفلاتة (كيبل) زي البطارية أو الشاشة أو البوردة السفلية، يبقى باقي المنظومة على الفلاتة.
Warning: لما يجيلك عطل حرارة، استشعر الأول: هل البوردة بتسخن ولا لأ؟ لو البوردة بتسخن، يبقى عطلك مش منظومة الحرارة، وتدور على مصدر الحرارة سواء شورت أو تسريب.
عطل الحرارة لازم يتفهم ويتقاس بدقة، مش مجرد فتح تطبيق لمعرفة مكان المقاومة الحرارية وتجاهل باقي المنظومة.