الـ Serial Port هيكون مستقبل صيانة المحمول والتريند الجديد، ولو كل الفرق اشتغلت عليه صح، الصيانة هتبقى أسهل بكتير. خلّيني أختصر الموضوع في نقط.
الأساس والعدة
- الـ Serial Port بيتستخدم في تحديد الأعطال من زمن النوكيا، وظهر تاني مع الآيفون بكابل DCSD، وأخيرًا في الأندرويد.
- التواصل بين الكمبيوتر ومعالج الموبايل محتاج وسيط، غالبًا كابل أو أدابتر فيه شريحة بتحوّل بين بروتوكول USB وUART والعكس.
- الداتا الخارجة مش دايمًا جمل إنجليزي تفهمها. فيه عبارات مكتوبة بالـ HEXA هتحتاج مترجم ليها (ممكن تستعين بالذكاء الاصطناعي مبدئيًا).
- التوصيل بعكس الأقطاب: بروتوكول UART فيه مسارين أساسيين TX وRX. بتوصل الـ TX بتاع الأداة بنقطة الـ RX بتاعة المعالج، والـ RX بتاع الأداة مع الـ TX بتاع المعالج.
بعد تجربة أكتر من أداة: كل الأدابترات هتقوم بالمطلوب مع بعض اختلافات في التوصيل والتعريفات على الويندوز. الأفضل تشتري الأداة اللي فيها شريحة FT232RL، وابعد عن الأداة اللي فيها شريحة CH340 أو CP2102 لأنها مش بتشتغل على السرعات العالية لقراءة معالج الموبايل، ومرهقة في تعريفاتها على الكمبيوتر.
الضبط: العائق اللي هيقف قدامك
- PuTTY: أسهل في الضبط وأسرع كتير، والضبط بتاعه في الصورة التانية. (سرعة 921600 على COM8 في المثال.)
- CoolTerm: مش بنصح بيه للمبتدئين.
- Serial Tool في تطبيق MaAnt الجديد: مش بنصح بيه، لأنه ناقص بعض السرعات زي 921600 وهي من السرعات المهمة لقراءة المعالج.
جرّب السرعات دي لحد ما تعمل لنفسك كتالوج مع كل معالج بيدخلك:
سرعات القراءة (Baud rate)115200 / 230400 / 460800 / 921600
لو القراءة فشلت
- بعد الفشل في كل عملية قراءة، افصل الأداة وأعد توصيلها، واقفل البرنامج وشغّله من جديد عشان تضمن نجاح المحاولة اللي بعدها.
- المعالج لازم يعدّي أول سحب على الباور سبلاي ويقلع مبدئيًا عشان يديك قراءة. الأجهزة اللي فيها شورت بيوقف الإقلاع أو مش بتستجيب لزر الباور مش هتديك أي قراءات.
- ليس كل المعالجات بتقبل القراءة. جرّب على كمبيوتر تاني ومنفذ USB تاني وغيّر السرعات. وانسى معالجات الـ SPD لأنها حتى لو قرأت، اللوج بتاعها ضعيف وشبه مش هيفيدك.
أماكن نقط التواصل
افتح المخطط (Schematics) وابحث بكلمة UART. لو النتايج كتير، دقّق في النتايج اللي فيها DBG أو DEBUG أو AP_TX أو AP_UART.
هستفيد إيه من اللوج؟
كأنك فتحت مغارة علي بابا: بتبص على منطقة الـ WATCHDOG في المعالج وبتتابع التسلسل المبدئي لعملية الإقلاع، واللوج بيدّيك بيانات كاملة عن حالة المعالج والذاكرة والرام وآيسيهات الشحن والباور وقيم الجهود والمقاومة الحرارية.
بس احذر: لازم يكون عندك فهم تام للدوائر وطبيعة عملها، عشان ما تقعش في أخطاء قراءة اللوج.