سامسونج SM-A127F جه لنا من الصعيد مع واحد من متدربينا. أول ما وصلناه على تيستر الشحن سحب 1.300 أمبير، والجهاز بيشتغل من غير ما يعرض حاجة على الشاشة. الشكل الأول: عطل إضاءة وبيانات. بس استنى لحظة.
الخطوة اللي قلبت التشخيص
لازم تتأكد إن السحب ده ماشي لشحن البطارية، ولو مش كده نرجع لتمهيدي الشحن. فصلت البطارية ووصلت الجهاز تاني على التيستر، والمفاجأة: سحب 1.300 أمبير حتى من غير بطارية.
هنا البوصلة بتلف 180 درجة: من عطل بيانات وإضاءة إلى عطل باور وشورت وتسريب. حسسنا على الحرارة الناتجة عن السحب ولقيناها تحت الـ RF shield بتاع الشبكة (الصاجة اللي بتغطي دائرة الشبكة).
الخطوات بالترتيب
- على الباور سبلاي السحب 0.070 أمبير، وضغطت مفتاح الباور: مفيش استجابة.
- قست ممانعة ملف الشحن CHG_LX (الملف الخاص بدائرة الشحن) فطلعت 100 بس. ده تأكيد إن فيه تسريب.
- حقنت في الملف تيار، السحب بقى 70 ملي أمبير بس، مع إن التيستر كان ساحب 1300. يعني اتحول من تسريب كلي لتسريب جزئي.
- رفعت صاجة الشبكة ولقيت أكسدة مش طبيعية في 3 مناطق متفرقة.
- رفعنا الآيسيهات والمكونات التالفة ونضفنا الشورتات تحتها لحد طبقات البوردة. فيه 3 قفلات، وكل مرة ننضف واحدة ممانعة ملف الشحن بتطلع.
- قست تاني: الممانعة وصلت 145 والسحب نزل من 70 إلى 50 ملي أمبير.
- ضغطت مفتاح الباور ولسه مفيش حاجة.
الباور مش بيشتغل، يبقى نشوف جهد المفتاح
قست جهد مفتاح الباور فلقيته 4.5 فولت، وأنا ضابط الباور سبلاي على 4.2 فولت. يعني آيسي الباور بيرفع الجهد! ده كان كفاية إني أرفعه، لكن واحد من المتدربين سألني: نرفع على طول ولا نقيس زي ما علمتنا؟ وهو معاه حق، فقسنا الأول.
رحنا لملفات الـ Buck SW (الملفات اللي بتطلع منها تغذية القطاعات بعد ما آيسي الباور يخفض الجهد) وقست ممانعاتها. واحد واحد: وقف، ارفع، شيك، احقن. وآيسي الباور طلع هو المتهم.
ممانعة ملف CHG_LX100 قبل الإصلاح، 145 بعد تنضيف الشورتات، 345 بعد رفع آيسي الباور (طبيعية)
النتيجة
بعد رفع آيسي الباور والتنضيف تحته اختفى سحب الأمبير، وممانعة ملف الشحن رجعت 345، وكده خلصنا على 4 قفلات في بوردة واحدة.
الدرس: قيس قبل ما ترفع. ولو شورت فلت منك ومعرفتش تفكه، راجع القواعد اللي اتشرحت وشوف هل طبقتها فعلاً.