طلابي سألوني سؤال متكرر: ليه Samsung A107F ما بيشحنش إلا بوجود البصمة؟ اتعجبت أول الأمر، لحد ما مرت عليا التجربة العملية واتفاجئت إن كلامهم صح.
أول فرضية: بروتوكول واحد
جاوبت قبل ما أفتح المخطط إن البصمة ممكن تكون على نفس بروتوكول التواصل بين المعالج وآيسي الشحن. بس لما فتحت المخطط اتراجعت عن رأيي: البروتوكول بين البصمة والمعالج SPI1_MO، ومختلف تمامًا عن اللي بين آيسي الشحن والمعالج SCL5.
تمهيدي الشحن والإقلاع
افتكرت حاجة مهمة: تمهيدي الشحن. اتكلمنا كتير في سحبات الباور سبلاي وتيستر الشحن إن سحبة تمهيدي الشحن من 90 لـ 280 مللي أمبير. في السحب ده مفيش أي أثر لدائرة الشحن كعملية شحن.
لكن اللي بيحصل في الخلفية: آيسي الشحن بيمرر التيار لآيسي الباور كمصدر أساسي للطاقة، متجاهل البطارية مبدئيًا لحد ما المعالج يكمل إقلاعه ويبدأ يحدد حالة البطارية، فنسحب تيار إضافي لشحنها.
وقلت إقلاع المعالج؟ يعني الجهاز هيحتاج ملفات الإقلاع من الذاكرة وفرد الضغط عنها في الرام (وهم بيدّوا نفس العطل وتوقف الشحن في أجهزة تانية).
نظرية البصمة
في حالتنا أتوقع إن البصمة مرفقة في أكواد ملف الـ Preloader للجهاز. وده الملف المسؤول في أجهزة ميدياتك عن ما قبل الإقلاع وظهور الشعار، وتلفه يسبب نفس عطل الشحن، ناهيك عن فصل الجهاز باور.
فلا مانع إن توقف الشاحن مع فصل البصمة يكون سببه خطأ في تكويد الـ Preloader، أو تعمّد من الشركة المصنعة. دي نظرية، والتأكيد محتاج تجربة برمجية: تعديل ملف الجهاز بحيث البصمة تتشال من آلية الإقلاع على الشاحن.