الإشارات التفعيلية أنواعها كتير، ومنها Reset وInterrupt. تعالوا نفهم الفرق.
الآيسي غبي
يعني إيه؟ يعني عشان يفهم أمر معين لازم نترجمه للحاجة اللي هو بيفهمها، وهو بيفهم كهرباء: جهد وتيار. اللي صنعه قاله: لو جالك جهد كذا اعمل كذا، ولو قطعت عنك جهد كذا اعمل كذا، ولو قيمة الجهد اتحولت من قيمة للتانية اعمل كذا.
هنا دورك إنك تقرأ مخطط وتفهم قيم الجهود في المسارات وطرق الفحص. أغلب الجهود في الإشارتين دول هي 1.8 فولت وصفر فولت (الأرضي).
إشارة Reset
ببساطة معناها: وقف وابدأ من جديد، أو اتحول من حالة لحالة. بنقابلها بين المعالج وآيسيهات الباور كإشارة تفعيل أو غلق في بعض الأحيان، وبين المعالج وآيسي الواي فاي (ومن الدلالات اللي بنستخدمها لكشف سلامة الآيسي). بتلاقيها في المخطط بالرمز RST.
وبتاخد شكل من 3: تلاقيها 1.8 فولت وبمجرد صدور الأمر تتحول للصفر، أو العكس، أو في الدوائر المنطقية تكون ترددية بين القيمتين. وفي بعض الدوائر بتستخدم بشكل عكسي كرد على اكتمال التفعيل.
إشارة Interrupt
طب لو عايز أفعل وظيفة من غير ما أوقف وظيفة تانية؟ هنا ييجي دور Interrupt، واختصارها في المخطط INT.
تخيل إنك فاتح الموبايل وبتلعب والبطارية قربت تفضى، ووصلت الشاحن. المعالج لازم يظهر علامة الشحن ويكمل تفعيل دائرة Buck SW، فنستأذنه: ممكن تبدأ الشحن من غير ما توقف اللعبة؟ أكيد، بس قولي INT.
وهتقابلها في اللمس كمان. الأجهزة النهاردة بتدعم multi touch، يعني تضغط على الشاشة بأكتر من صباع من غير تداخل. مع كل ضغطة لازم ننبه المعالج لعملية جديدة من غير ما نوقف القديمة، فنديله INT.
فكرة عملها: حط في دماغك إنها جاية من برة لجوه. مثلاً من آيسي الشحن لآيسي الباور، أو من آيسي اللمس للمعالج. وبرضه بتتم بتحويل قيمة المسار بين الجهدين اللي فوق.
نقيسها إزاي؟
- بالأفوميتر، بس لازم تكون فاهم المخطط عشان تعرف حالة المسار قبل الإشارة وبعدها.
- باستخدام اللوجيك بروب الموجود في أداة JTT، عشان تشوف تحول القيم اللي بيحصل.