وضع قد يكون هو الأهم لو فهمته صح. REL هي اختصار Relative، يعني «نسبيًا». المهم إنك تفهم إنه بيقيس الفرق.
الاستخدام الأول: تصفير القراءة
لو ماسك أفوميتر وبتقيس فولت، أول ما تظبط على وضع الفولت وبدون ما تعمل أي حاجة ممكن تلاقي قيم بالمللي فولت بتظهر على الشاشة. دوس REL قبل ما تدخل على البوردة، القيم هتتثبت على الصفر، كأنك بتقوله أنا عارف إن معايا قيم مش مظبوطة وعايزك تطلعلي قيمة مظبوطة على البوردة.
الاستخدام التاني: طرح مقاومة البروبات
لو داخل تقيس مقاومة قيمتها قليلة، مين قالك إن مقاومة البروبات نفسها مش محسوبة؟ المس طرفي الأفوميتر في بعض، ولو ظهرت قيمة دوس REL فالشاشة تتصفر 0.000. دلوقت الأفوميتر هيحسب أي مقاومة ويستثني منها مقاومة البروب، والقراءة اللي قدامك هي القيمة الصحيحة. وده بمثابة معايرة لوضع القياس. ومهم جدًا لو الأفوميتر بدأ يخرف وبتفكر تغيره.
الاستخدام التالت: قياس الفرق بين قطعتين
قيس مقاومة، قيمتها مثلًا 1 كيلو أوم. وإنت واقف بتقيس دوس REL، هيعطيك 0.000. دلوقت روح على أي بوردة فيها نفس المقاومة وقيس: هتظهرلك قيم صغيرة. دي الفرق بين قيمة المقاومتين، أو بدقة أكتر الفرق بين المقاومة الكلية بين طرفي الأفوميتر عند نقطتي القياس.
يعني مبقيتش محتاج تخلع المكونات عشان تحسب الفروقات البسيطة والدقيقة دي. وجربها مع المكثفات: احسب السعة الكلية للمسار ودوس REL واحسب الفرق مع بوردة تانية لو شاكك إن فيه مكثف مسرّب. وكمان نفس الحركة مع قياس الفولت عشان تقفش إن الآيسي بينتج مظبوط ولا لا، وبالمللي فولت لو بتقيس إشارات دقيقة زي CLK.