لو بتمرن إيدك على شبلنة الآيسيهات (Reballing، يعني إعادة عمل كور القصدير تحت الآيسي) ولسه عندك مشاكل: مش عيب إن عندك ضعف في جزئية، العيب إنك تبطل تحاول. أغلب الناس اللي بتفشل في الشبلنة بتفشل بسبب نوع القصدير أو نوع الشبلونة، فاتأكد من العدة الأول.
القصدير
- لازم القصدير اللي على الآيسي يكون من نفس درجة انصهار القصدير اللي هتشبلن بيه. يعني ما ترفعش الآيسي وتمشي عليه بسن الكاوية بس، اخلط بقصدير من نفس النوع.
- درجة الانصهار: 183. أنا مش بفضّل 217 خالص، وفي مناطق هتزعل لو نزلت فيها بـ 217، ولو شغال في بوردات الأيفون انسى الـ 217. وقصدير 138 هتزعل منه في الشبلنة والتنزيل والمرتجعات من الزباين.
- للقصدير تاريخ صلاحية، وأغلب المستوردين بيكبروا دماغهم من الحتة دي. فالعلبة اللي اشتريتها ممكن تكدّرك.
اختبار الزجاج: لما تشتري علبة قصدير جديدة (شكلها طازة مش متربة)، خد نقطة منها وحطها على سطح زجاجي وسخن عليها بالهوت إير على هواء قليل. لو عملت كورة واحدة وما فيش هدر كتير حواليها، اعتمدها. غير كده غيّر الصنف.
وما تنشفش القصدير في منديل. خد من تحت العلبة بعد ما تأخر شوية القصدير اللي على الوش، يكون وسط: لا مليان فلاكس ولا ناشف.
الشبلونة (Stencil)
اشتري شبلونة لا مرنة أوي ولا ناشفة أوي، لأن خامتها هتفرق معاك. وركز في الفتحات: لو مدورة بلاش، هات المربعة.
إيدك وطريقتك
- الحرارة والهواء: الشبلنة بدرجة حرارة معينة أو هواء معين أسطورة. العامل الفارق هو تجربتك مع خامة الشبلونة: الرقيقة حرارة قليلة وهواء وسط، المحملة هواء قليل وحرارة عالية وخفة إيد، والمغناطيسية حرارة وهواء زي الرفع. لو الشبلونة نفخت وقوّست هدّي الهواء والحرارة.
- المنديل: استخدم منديل مطبخ محمل وبلاش استخسار، ولو معالج دبّل المنديل واضغط عليه عشان يغطس في مكانه ويعلّم.
- الملقاط (الجفت): هات واحد معوج، وقفل على حدود الآيسي بالضبط. ما تزحلقوش فوق الشبلونة عشان هتعمل عجينة.
- خلط القصدير: تأكد إنك لفيت على الرجول كلها بسن الكاوية بنفس القصدير اللي هتشبلن بيه.
- فرد القصدير: بصوابعك، وما تضغطش على الشبلونة وانت بتفرده عشان ما يتخزنش قصدير تحتها.
- الشيلد: لو ضهر الآيسي كريستال أصفر الأفضل ما تنضفوش بالشيلد (احتمال كبير تجرحه أو تقطع مسارات)، سيبه على خلط القصدير وشبلن. ولو ضهره أخضر وبيزحلق، لفة شيلد بعد الخلط تسهّل الشبلنة.
Warning: اتأكد إن الآيسي نظيف جدًا وجاف جدًا قبل الشبلنة. وكتر المحاولة في نفس الآيسي بتخليه يرفض الشبلنة، وقتها هدّي حرارة الهوت إير.
إمتى تشبلن وإمتى تغيّر الآيسي؟
الشبلنة بتتم في حالات الفصل أو القطع: سحب أمبير ضعيف أقل من المطلوب أو من المعتاد مع جهاز سليم من نفس النوع، أو ممانعة OL أو أعلى من المطلوب، أو اختفاء جهد أو إشارة أو عملية Switch.
أما لو فيه سحب أعلى من المطلوب مع حرارة، فتغيير الآيسي أضمن وأفضل. وحتى لو البوردة وقعت في سائل (ممكن يكون الشورت أسفل الآيسي مش في أحد قطاعاته)، أفضّل تغييره، لأن السحب العالي والحرارة ممكن يؤديوا للتلف بعد كده.