في الفترة الأخيرة بدأنا نقابل مشكلة متكررة في أجهزة ريلمي وإنفنكس، الفئات الاقتصادية. الأجهزة دي بتدخل في فاصلة باور بشكل متكرر، ولما تفحصها على الباور سبلاي بتلاقي الشكل ده:
- سحبة أولى: 40 – 60 mA.
- بعدها: 70 – 100 mA.
- ترجع تاني لـ 40 – 60 mA وتستقر عليها.
- وبمجرد ما ترفع صباعك من مفتاح الباور العداد يرجع لصفر.
السلوك ده غالبًا بيشير لمشاكل مرتبطة بالـ RAM / eMMC أو تغذية الرام، بنسبة 90% من الحالات. والـ eMMC هي الذاكرة الداخلية اللي متخزن عليها السوفت وير.
ليه المشكلة دي بقت شائعة؟
- في الشهور اللي فاتت بدأ بعض التجار يجمعوا بوردات التقطيع من السوق المصري لهدف واحد: آيسيهات الذواكر.
- أسعار البوردات ارتفعت، وتيجي تسأل تاجر يقولك دي فيها ذاكرة 128 ولا 64، لأن الطلب كله متركز على الذواكر.
- الذواكر دي بتتصفر (Control Unit Reset) وبتتركب في أجهزة جديدة من غير مراعاة عمر الخلايا (Health Report).
النتيجة: موبايلات كتير بذاكرة ضعيفة بتتلف بسرعة وتدخل صيانة.
طب إزاي الجهاز أحيانًا بياخد سوفت وير ويقوم؟
لأن وحدة التحكم في الذاكرة (Control Unit) بتعيد ترتيب الخلايا دايمًا في جدول الـ GPT. لكن بعد التصفير، الخوارزمية دي بتبدأ تستخدم خلايا تالفة لتخزين ملفات السوفت وير، فيحصل فشل إقلاع.
ولو فني السوفت عمل تفليش بصيغة المعالج، ممكن النظام يعيد التوزيع على خلايا تانية أقل تضررًا، فالجهاز يقوم مؤقتًا.
المفاجأة الأخطر: ذواكر بمساحات وهمية
- الصين بدأت تصنع ذواكر غير معلن عنها بأسماء شركات وهمية.
- بعض الذواكر دي بتديك مساحات وهمية، زي الفلاشات المضروبة 128 جيجا اللي في أول استخدام تبان إنها فاضية.
- والنتيجة إن السوق مليان أجهزة جديدة بذاكرة غير موثوقة.
تعمل إيه؟
العطل ده بقى متكرر جدًا في محلات الصيانة، وحله محتاج تعاون بين فني السوفت وير وفني الهارد وير. ووجود بوكس ذاكرة داخلية بقى ضرورة لو ناوي تكمل في الشغل مع النوعية دي من الأجهزة. الكلام ده مش مجرد معلومة، ده تنبيه عشان تبقى مستعد وتعرف تواجه المشكلة بشكل عملي.