الأوسيلوسكوب (راسم الإشارة) جهاز بياخد عينة أو عينات متعددة من الإشارة ويعرضها على شاشة. تعالى نتعرف عليه وعلى أهم أزراره.
التوصيل والأنواع
بيتوصل في أغلب إشاراتنا على التوازي: الأرضي على أرضي البوردة، وطرف القياس على نقطة القياس. والتوازي معناه إنه بيقسم تيار المسار، فلو فيه مشكلة في البروب (سلك القياس) ممكن تتشتت الإشارة نفسها في الهاتف ويطلع نتائج سيئة.
فيه نوعين أساسيين، Digital وAnalog، ولو هتشتري اشتري الديجيتال، واوعى حد يبيعلك الأنالوج عشان سعره قليل. والديجيتال أنواع أهمها MSO وDSO. الـ MSO سعره هيخليك تلغي الفكرة، فالأفضل DSO.
الأزرار الأساسية
- V/Div: بيقسم الشاشة رأسيًا لمربعات. لو ظبطته على 1 فولت، كل مربع 1 فولت، فإشارة 4 فولت هتعد أربع مربعات.
- T/Div: بيقسم الشاشة أفقيًا. لو ظبطته على 1 SEC، فكل مرة الموجة تعدي مربع كأنها عدت ثانية.
- Trigger: هو سرعة إطلاق الموجة (هنتكلم عنه تحت).
- Measure: بتفتح إعداداته عشان يعرضلك على الشاشة مع الموجة قيمها كجهد وتردد.
- Math: مهم لو هتعمل Decode، يعني فك تشفير بروتوكول تواصل عشان تتابع حديث المعالج مع الآيسيهات.
- Auto: بيظبط V/Div وT/Div وTrigger أوتوماتيكيًا، ولذيذ للمبتدئ.
مثال: إشارة CLK من كريستالة آيسي الباور
الإشارة دي قيمتها في المتوسط 800 مللي فولت وترددها 32KHz. لو ظبطت V/Div على 1 فولت، الموجة هتظهر صغيرة أوي مش هتكمل مربع، فتقلل الضبط لـ 500 mV فتاخد مربع ونص تقريبًا. وعايز تكبر الإشارة أكتر؟ قلل V/Div.
وT/Div بتظبطها حسب التردد، لأن الزمن الدوري مقلوب التردد. ولو عايز تمطّ الموجة بالعرض عشان تبان واضحة، قلل T/Div.
الـ Trigger وأوضاعه التلاتة
الموجات اللي بنعرضها بتتكرر في أجزاء من الثانية، فمش هنقدر بعينينا نجري وراها. فبنلجأ للـ Trigger عشان ناخد عينة (Sample) ونهدي من سرعة عرضها.
- Auto: من اسمه، بيحاول يعرف شكل الإشارة ويظبط سرعة الإطلاق لوحده. بس مش مفيد في أغلب قياساتنا.
- Normal: لازم تظبطه من زرار Menu وتختار شكل الإشارة المتوقع. موجة CLK تظبطه على Slope أو Edge. وإشارة زي RESET أو INT تظبطه على Pulse أو Edge. وبروتوكول زي i2c بعض الأوسيلوسكوبات بتدعمه كتريجر منفصل، وفي بعضها لأ فتظبطه على Serial.
- Single: لو عايز تشوف عينة واحدة بعينها.
ومن هنا يتضح إن Trigger هو أهم زر في الأوسيلوسكوب، ومعتمد بشكل أساسي على فهمك لشكل الإشارة.