تعالى أخلصلك أعطال الباور وفشل الإقلاع والريستارت (اللي المتسبب فيها منظومة الباور) في مقال واحد للأجهزة اللي فيها معالجات MEDIATEK.
لاحظنا إشارة بتربط آيسي الباور بالمعالج اسمها RESETB أو اختصارها SYSRSTB، وعملنا بحث لحالتها في الأعطال المختلفة. دي النتايج.
أولاً: لاقيها على البوردة
الإشارة بتعدّي على نقطة اختبار (TP)، لكن للأسف مش هتلاقيها مذكورة في الـ BITMAP. هتقدر تحدد مكانها بس بربط الـ SCHEMATIC بالـ LAYOUT، أو بالـ MULTI LAYER في برنامج XZZ.
تانيًا: قيسها
محتاج أوسيلوسكوب. الملتيميتر مش هيظهرلك التغيرات السريعة اللي بتحصل على الإشارة.
تالتًا: النتايج اللي وصلنا لها
| الحالة | شكل الإشارة |
|---|---|
| الباور سليم | بتفضل ثابتة على 1.8 فولت بعد الضغط على زر الباور، وأثناء الإقلاع، وبعد ما الجهاز يدخل وضع الخمول (Sleep) |
| فشل في أحد جهود الـ BUCK | بتروح لـ 1.8 فولت بعد الضغط على الباور، وبعدين ترجع للصفر، وترتفع تاني لـ 1.8 فولت لمدة 8 مللي ثانية وترجع للصفر، وتفضل كده مع اختفاء سحب الأمبير على الباور سبلاي |
| فشل في أحد جهود الـ LDO | بتروح لـ 1.8 فولت، وبعدين ترجع للصفر وتتذبذب حواليه حسب نوع جهد الـ LDO وتوقيت خروجه وأهميته، وبعدها ترتفع لـ 1.8 فولت لمدة 8 مللي ثانية وترجع للصفر، مع اختفاء سحب الباور سبلاي |
| تسريب كلي على مسارات BUCK | الإشارة مش بتتحرك من 0.0 فولت من الأساس بعد الضغط على زر الباور |
| تسريب كلي على جهود LDO | الإشارة بتتذبذب من لحظة الضغط على الباور، وبعدين تستقر على 0.0 فولت بعد ما تسيب زر الباور |
الـ BUCK دايرة بتنزّل الجهد بتيار كبير، والـ LDO منظم جهد أصغر. وجربنا جهدين من الـ LDO وفيهم شورت بعد الإقلاع: على VIO18 كان التذبذب بسيط جدًا، وعلى VUSB كان التذبذب بيتراوح بين 0.0 و1.8 فولت. وده العيب المشهور، بدل ما تحتار وتلف رايح جاي بين المعالج وآيسي الباور.
طب أستفيد إيه؟
لو قدرت تجيب أوسيلوسكوب، وقرأت المخطط وحددت مكان نقطة اختبار الإشارة، وقارنت نتايجك بالنتايج اللي فوق، هتعرف بما لا يدع مجال للشك إنك عديّت منظومة الباور ولا لسه فيها، وإنك لازم تراجع آيسي الباور وخرجه.
وخد بالك من معلومة مهمة جدًا: الإشارة دي بتنتج كمان بعد أمر التفعيل الخارج من آيسي الباور الرئيسي لآيسيهات الباور الـ EXT. يعني أعطال المنظومات الثانوية ممكن تأثر عليها.
ومعلومة كمان: إشارة WATCHDOG القادمة من المعالج هي رد المعالج على إشارة RESETB من آيسي الباور. فبمشاهدة الإشارتين مع بعض تقدر تحصر العطل: باور ولا معالج.