السؤال ده بقى مطلب جماهيري: اعمل إيه لو كل قياساتي سليمة؟ وإيه أفضل أفوميتر أشتغل بيه؟ قبل أي تفاصيل، نفهم الأول يعني إيه قياس: هو مقارنة بين قيمتين، القيمة المتوقعة والقيمة المقاسة.
القيمة المتوقعة تيجي منين
- المخطط: هو الأصل، منه بتستنتج الجهود والمقاومات بالأوم وسعة المكثفات بالفاراد.
- بوردة سليمة: البديل المثالي للناس الضعيفة في المخططات. منها بتستنتج الممانعات (والممانعات مش موجودة في المخططات) والجهود والمقاومات والسعات.
بعد ما تطلع القيمة المتوقعة تبدأ تقيس وتقارن، وتحط نسبة خطأ 5% زيادة أو نقصان لو الأفوميتر ابن ناس. وبلاش مفهوم الممانعة يبقى عندك «فيه قيمة أو مافيش» وبس، ده معناه إنك بتقيس غلط.
ممانعات برامج المخططات
أكبر غلط تقارن الممانعة بالقيم اللي في برامج المخططات. أغلب برامج المخططات الممانعات فيها مرفوعة بأفوميتر تاني غير اللي إنت شغال بيه. فاخرك تقارن حالتين بس: قطع يعني OL، أو تسريب مع الأرضي يعني 0.000. أما الممانعة الأقل أو الأعلى من المطلوب فما تجزمش بيها بالمقارنة مع البرامج، إلا لو الفروقات كبيرة وتتجاوز 200 مللي فولت. والحالتين دول بالذات هما اللي عطلك بيكون واقف عليهم، ومش هتوصلهم غير ببوردة سليمة من نفس الموديل.
تتبع المسارات والتوالي والتوازي
بتتبع المسارات على وضع البازر؟ ما تمرش تعليمي فيك. التوصيل لو سيء المسار برضه هيدي صوت. تتبع على وضع الدايود. وكمان وضع البازر ممكن يفشل تفرّق توالي من توازي.
لو ماشي بوضع البازر على البوردة وواقف بطرف الأفوميتر على الأرضي، ولقيت مكون بيدي صوت من الناحيتين مع الأرضي، ممكن يبقى تسريب فعلًا. لكن فيه عناصر سليمة بتدي صوت من الناحيتين:
- عنصر توالي (ملف أو فيوز أو فلتر أو مقاومة قيمتها أقل من 200 أوم) موجود على مسار فيه شورت مع الأرضي.
- ملف توازي مع الأرضي، زي اللي على مسارات الأنتينة والباندات في دوائر الإرسال والاستقبال.
- ملف SW لإنتاج الجهد السالب في دوائر OLED.
- مسارات تغذية المعالج، ممانعتها ضعيفة بسبب تعدد الأنوية.
قياس الجهد
بتظبط على جهد مستمر، والسالب على الأرضي والموجب على المسار. وعشان تقيس جهد محتاج 3 شروط:
- فكرة عمل الدائرة وقيمة الجهد من المخطط وميعاد خروجه وتوقف خروجه.
- المكتوب في المخطط أقصى قيمة للجهد على المسار، فمش شرط تلاقيها 100% على البوردة.
- استقرار الجهد: تقيسه لفترة زمنية (مدة عمل الدائرة أو ظهور الجهد). وانتظام منحنى الجهد مش هيحققه غير الأوسيلوسكوب، لأن التشوهات في شكل الجهد ممكن تكون مؤشر لتلف عنصر في الدائرة.
وحاول إيدك ما تلامسش البوردة وأنت بتقيس، عشان الكهرباء الاستاتيكية اللي في جسمك. وفي أول فرصة اشتري أوسيلوسكوب لو عايز فعلًا تبطل هبد وتدخل على مكان العيب عدل.
أفوميتر UNI-T UT33A+
في الأيام الأخيرة وقع قدامي أفوميتر صغير فيه كل اللي نفسك فيه: Auto Range، Ohm، DC وAC Volt، مللي فولت، وضع الدايود، سعة المكثفات، وكمان وضع REL. وبالنسبة للمعايرة، عملنا تجربة عملية على بوردة OPPO A1K: قياس ممانعة على وضع الدايود (Voltage Drop) لمسار PMU_Vio18 بتلات أفوميترات.
| الأفوميتر | القراءة |
|---|---|
| Sunshine DT17n | 363 |
| Fluke 101 | 325 |
| Uni-T UT33A+ | 342 |
يعني معايرته دقيقة في النطاق القريب من الـ Fluke.