مقاومة في بوردة SM-A125F، قستها وهي مكانها طلعت 1.923 كيلو أوم. قستها تاني بعد شوية طلعت 96.2 كيلو أوم. والمخطط بيقول 2 كيلو. مين الصادق ومين الكذاب؟ لسه مانعرفش، ودي بالظبط اللي عايزك تفهمها.
القياس أصلاً مقارنة
عملية القياس هي مقارنة بين القيمة المتوقعة والقيمة المقاسة. المقاسة من الأفوميتر، طب المتوقعة منين؟ من تلات مصادر:
- المخطط.
- بوردة سليمة.
- فهمك للدايرة، زي مقاومات Pull-up على مسارات i2c، قيمها معروفة ومحدودة.
ولو الجهاز ملوش مخطط، يبقى عندك البوردة السليمة أو فهم الدايرة.
قبل ما تحط الأطراف
- حوّل الأفوميتر على وضع الأوم، مش قياس الجهد.
- افصل مصادر الطاقة.
- فرّغ الشحنات: المس المسار بالأرضي، وده بدون أي مصدر طاقة، وإلا هتعمل شورت.
- ماتمسكش الطرف النحاس ولا تلمس البوردة بإيدك. جسمك ليه مقاومة وهيدخل في القراءة، وممكن تشوفها بعينك على الأفوميتر الحساس.
- اقف على الرجل من فوق، مش من جوانب المكون.
ليه القراءة على البوردة مش قراءة المقاومة؟
المقاومة ماسكة في مسار عليه آيسي ومكونات تانية. يعني اللي بيقراه الأفوميتر مش المقاومة دي لوحدها، ده المقاومة الكلية بين طرفين الأفوميتر. فالقراءة دي ماتثبتش سلامة ولا تلف.
ماشي، ينفع أقارن ببوردة سليمة وأنا مش فاصل حاجة؟ أيوه ينفع، بس بتقارن كلية بكلية. لو القيمة اختلفت، ده يثبت إن فيه مشكلة في المسار بشكل عام: يا الآيسي، يا المقاومة، يا مكثف، يا أي مكون فيه تسريب. مايثبتش إن المقاومة نفسها تلفت.
القاعدة: عشان تأكد على مقاومة، افصل أحد أطرافها من البوردة وقس.
قصة الـ 96 كيلو
وأنا برفع الآيسي اللي جنبها، ضغطت على طرف المقاومة ضغطة جامدة. الجزء الأسود بتاعها باين سليم، بس القراءة بقت 96.2 كيلو. نرفع طرف ونتأكد؟ هنا كمان، وأنا بحركها ظهر الشرخ بعيني.
Warning: المقاومة ممكن تبصلها من برة تحس إنها سليمة، ومن جوه خدش بسيط يطيرها. المقاومة حساسة جدًا للخربشة والكسر، فخد بالك وانت شغال حواليها.
ولما تيجي تحط فلاكس على المكان، ماتاخدش فلاكس فيه شوائب، ممكن يبقى على راسه سنة قصدير وتعملك شورت. تبقى جاي تصلح عيب وعملت عيب تاني.
نسبة التفاوت: إزاي تحكم على القراءة؟
المخطط كاتب 2 كيلو و1%. الواحد في المية دي نسبة التفاوت: المقاومة ممكن تديك أعلى أو أقل بواحد في المية.
حساب التفاوت1% من 2 كيلو = 20 أوم، يعني 20 فوق و20 تحت
قسنا مقاومة 2 كيلو مفصولة وطلعت 1.999 كيلو، يعني 1999 أوم. جوه الحدود؟ جوه. يبقى سليمة.
استنى البوردة تبرد
قست بعد التسخين على طول، والقراءة مش بتثبت؟ المقاومة بتتأثر بالحرارة، فلازم تبرد البوردة الأول. كل ما البوردة بتبرد، هتلاقي القراءة بتثبت معاك. ولو بتقيس مقاومة حرارية، الفرق هيبقى رهيب، لأنها معمولة أصلاً تتغير مع درجة الحرارة.
خلاصة: قراءة على المسار معناها مسار. قراءة بعد الفصل والتبريد، وحسبت التفاوت، معناها مقاومة.