جالي ايفون 8 بلس من واحد صاحبي مهندس صيانة. الجهاز كان بيتغير له الهاوس (الشاسيه)، وبعد ما خلص التقفيل رفض يشتغل. العطل ده هيتكرر معاكم كتير الفترة الجاية، فخدوا بالكم.
أول تحليل على الباور سبلاي
فكينا الفلاتات واحدة ورا التانية وجربنا بعد كل واحدة، وراجعنا قواعد المسامير عشان نتأكد إن مفيش مسمار طويل، وبصينا على التحميل على الباور سبلاي كل مرة. والتحميل هنا هو الأمبير اللي بيطلع على الباور سبلاي سلمة ورا سلمة مع مراحل الإقلاع، واسمه سلم التحميل. اللي لقيناه:
- البوردة لوحدها على الشاشة: أول سلمة في السلم بتبدأ من 50 مللي أمبير.
- أول ما نوصل فلاتة الشحن (Dock Flex): أول سلمة بتبقى 230 مللي أمبير، والتحميل بيفضل يعلى وينزل بنفس معدل الزيادة اللي في أول سلمة.
يعني الجهاز شغال فعلا، بس مفيش عرض. شكيت في فلاتة الشحن على طول وطلبت من صاحبي يغيرها، وكان مجهز واحدة تانية. والغريب إن الفلاتة التانية دي كمان طلعت نفس التحميلة.
الممانعات سليمة، يبقى العطل فين؟
هنا لازم نفحص بشكل تاني. قست الممانعات (Diode Values، يعني القياس بوضع الدايود في الأفوميتر) على كونكتور فلاتة الشحن وكلها طلعت سليمة، مع مراعاة إن رجل واحدة قيمتها بتختلف بين بوردة انتل وبوردة كوالكوم.
طب إيه معنى كده؟ معناه إن في دايرة بتتقفل لما نركب الفلاتة وهي اللي بتعمل المشكلة. فمشيت ورا الرجول اللي ممانعتها O.L (يعني مفتوحة ومستنية مكون يتركب ويقفل الدايرة). المسارين اللي قابلتهم بالخاصية دي:
- LOWERMIC1_TO_CODEC_BIAS_FILT_RET
- LOWERMIC4_TO_CODEC_BIAS_FILT_RET
والاتنين ملهمش علاقة بالعرض. وهنا افتكرت اللي بقوله لطلابي: لو أول سلمة أعلى من المتوقع يبقى في شورت على دخل أو خرج المعالج. رجعت لمسارات الكونكتور ولقيت مسارين من بروتوكول I2C (ده خطين اتصال، SCL و SDA، الدوائر بتتكلم بيهم مع بعض). تتبعتهم ولقيت إن واحد منهم مشترك مع الشاشة:
| مكان القياس | اسم المسار | الرجول |
|---|---|---|
| كونكتور فلاتة الشحن | I2C3_AP_TO_SAKONNET_SCL_CONN و I2C3_AP_BI_SAKONNET_SDA_CONN | 40 و 38 |
| كونكتور الشاشة | I2C_DISP_EEPROM_SCL_CONN و I2C_DISP_EEPROM_SDA_CONN | 2 و 3 |
بس إحنا غيرنا فلاتة الشحن، فإزاي الشورت ده بيحصل؟ رجعت لمرجع صيني عندي وأكد إن المشكلة في فلاتة الشحن. وهنا فضيت ايدي من الفلاتات اللي صاحبي جابها. فكينا ايفون 8 بلس تاني ووصلنا البوردة على فلاتة الشحن بتاعته، والجهاز اشتغل بشكل طبيعي.
الخلاصة
- قطع الغيار الأصلية من أبل في الايفون لا غنى عنها، واللي يحاول يقنعك بغير كده ماتصدقوش.
- لو سلم التحميل على الباور سبلاي اختلف قبل وبعد توصيل فلاتة معينة، يبقى في شورت على دخل أو خرج المعالج. انطلق من هنا.
- الخطأ في مسار I2C واحد بيعطل أكتر من دايرة على نفس البروتوكول.