آيفون 8 بلس ظهرت فيه خطوط طولية في الشاشة، والبيانات بتختفي تدريجياً كل ما الجهاز يقرب من الإقلاع، ولو أقلع اللمس بيتجمد. الجهاز وصل لده بعد ما واحد من الطلاب حاول يغير الشاشة للعميل وركب شاشة آيفون 7 بلس بدل شاشة 8 بلس. احترس من الحركة دي.
اشتغلنا عليه بعد المحاضرة مع الطلاب.
خطوات الإصلاح
- فصلت مسار الـ Sync حسب العطل المشهور الناتج عن الغلطة دي. ما حصلش حاجة والوضع زي ما هو.
- قست جهود تغذية الشاشة: جهد PP5V1 مش موجود، وجهدي PP5V7 وPN5V7 مش متطابقين. أصابع الاتهام راحت لآيسي باور الشاشة، مع إن الملفات سليمة لأن باقي الجهود حصل لها تضخيم.
- نضفت الأندرفيل وقست ممانعات كونكتور الشاشة. لقيت ممانعة متدنية في مسار PP1V8_display المغذى من PP1V8IO.
- حقنت المسار تحت الكاميرا الحرارية: سحب 11 ملي أمبير وسخن المذبذب. رفعت المذبذب وبدلته ولا حصل حاجة، لأنه أصلاً مش واصل على المسار ده.
ليه 11 ملي أمبير وليه المذبذب سخن؟
المسار 1.8 فولت خاص بتفعيلات دوائر الديجيتال، وهي دوائر ممكن تكون مسقلة (Registry) في بعض الآيسيهات، فسحب 11 ملي أمبير مش غريب.
المذبذب سخن لأنه بيتغذى من جوه المعالج. لما حقنت المسار ده بالذات اشتغل هو دون باقي قطاعات البوردة، فبقى تقريباً المستهلك الوحيد للطاقة.
وقفة قرار
هل أمشي ورا الممانعة المتدنية وممكن توصلني لعطل في المعالج نفسه؟ ولا أصلح الهاتف وأطلع الطالب من الحرج قدام عميله؟ اخترت الاختيار التاني، وماشي على القاعدة: لا تحرك ساكناً فتبتلى به.
بدلت آيسي باور الشاشة مباشرة، فخرج جهد 5.1 فولت ورجع الجهاز للعمل واللمس اشتغل.
الخلاصة
- الفهم بيريح.
- العطل المحفوظ مش دايماً صح.
- أوقات نسيب عطل بيسحبنا وراه وبنخسر البوردة، فماتحبكهاش.