السؤال ده جالي كذا مرة: بغيّر شاشة آيفون 7 Plus أو 7 أو 8 Plus أو 8، فيحصل واحد من التلاتة: اللمس يقف، أو البصمة تقف، أو الجهاز يقف على الشعار. ليه؟
ليه تغيير الشاشة يوقف اللمس أو البصمة؟
المشكلة غالبًا بتيجي من البصمة. الناس بتركب شاشة 7 Plus على 8 Plus أو العكس، أو شاشة 7 على 8 أو العكس، وفيه اختلاف في مسارات البصمة بين الاتنين.
والنقطة هنا إن زرار الهوم في الأجهزة دي بقى Touch، مش ضغطة مفتاح. يعني بقى عندك Touch على الشاشة وTouch على البصمة، والجهاز محتاج تزامن بين الاتنين. لما المسارات تختلف، التزامن يبوظ.
التزامن ده ماشي على إيه؟
على رجلين في الكونكتور J3801:
- رجل 12: خط MAMBA_TO_LCM_MDRIVE_CONN_MESA.
- رجل 14: خط LCM_TO_MAMBA_MSYNC_CONN.
الحل إيه؟
لما يحصل معاك عطل من اللي فوق، بتفصل المسارين دول عن البصمة:
- رجل 14: تروح على البصمة وتشيل الرجل دي نفسها.
- رجل 12: هتلاقي على المسار فلتر على التوالي، غالبًا في ضهر البوردة، زي FL3804 في البورد فيو. اخلعه من مكانه. الطرف التاني بتاعه واصل على كونكتور الشاشة.
ليه سطارة الإشعارات بتنزل لوحدها؟
ده عطل تاني مشهور في الجهاز ده: سطارة الـ Notification بتنزل أوتوماتيك، أو اللمس يقف، أو البصمة تقف. ودي غالبًا بتحصل معاك بعد الشغل في آيسي الصوت.
المسؤول عن الأعطال دي بيكون الآيسي U3601. فلو الجهاز جالك بالشكل ده بعد شغل في آيسي الصوت، ابدأ بصّتك من عنده.