ايفون 6s بلس العميل شاكي من تسريب واستهلاك عالي في البطارية. الجهاز مغير بطارية، وحالة البوردة زيرو. خلينا نشوف مشينا إزاي.
اللي قالته التحميلة
وصلت الجهاز على الباور سبلاي ولقيت السحب 0.238 أمبير قبل الضغط على مفتاح الباور، والجهاز شغال طبيعي. السحب ده معناه إن في استهلاك جوه واحد من الآيسيهات الموجودة على جهد تغذية. طب ليه؟
- لو السحب قبل الضغط على الباور في الايفون أقل من 200 مللي أمبير كنا هنروح في مسارات وتحليل تاني.
- لو السحب زاد عن 500 مللي أمبير كنا هنروح لدوائر التضخيم.
بين العطل المحفوظ والفهم
هنا لمع في دماغي العطل المشهور للجهاز ده بالذات: آيسي الواي فاي في 6s بلس. وبدأت فعلا أنضف مادة الأندرفيل من على ضهر آيسي الواي فاي عشان أرفعه. وفجأة وقفت: بتأمر الناس بالفهم وبتنسى نفسك؟ ماتنجرفش ورا الأعطال المحفوظة.
رجعت لمسارات Vbatt و Vcc_main (ده جهد التغذية الرئيسي للبوردة) وقست الممانعات. لقيت انخفاض واضح في ممانعة Vcc_main.
الحقن والسخونة
ضخيت تيار للبوردة من الباور سبلاي، وعديت على السخونة الضعيفة الطالعة من سحب الـ 238 ملي أمبير. وقمت شربت شاي ورجعتله. المفاجأة كانت سخونة في آيسي مضاعف الطاقة للـ 2G. يعني مش آيسي الواي فاي المشهور، لا يا بيه مش هو.
رفعت الآيسي واختفى السحب. بس لحظة: الشورت جوه الآيسي ولا على الخرج؟ قيس الممانعات تحت الآيسي واتأكد قبل ما تنزل واحد تاني. بعدها نزلت آيسي من بوردة تقطيع (يعني بوردة جهاز تاني بنسحب منها القطع)، وتابعت التحميل ورجع كل حاجة لطبيعتها.
الدروس
- فهم حركة التيار على البوردة من أهم المبادئ اللي لازم يتعلمها مهندس الصيانة، وهي قواعد إلكترونية أساسية مهما اختلف الموديل، ايفون أو اندرويد.
- ماتحفظش الأعطال. اللي بيحب صيانة الايفون عشان أعطاله محفوظة وبيشتغل من غير فهم وتحليل، بيهبد.
- اهتم بنضافة شغلك.
