جالنا سؤال من طالب: آيفون 6، البصمة شغالة 100%، لكن الزرار نفسه مش بيستجيب للضغط. طب خلينا نفكر: البصمة شغالة والضغطة لأ، يبقى مسار زرار الهوم هو اللي فيه المشكلة. نوصله إزاي من المخطط؟ واحدة واحدة كده.
أبدأ منين في المخطط؟
من الكونكتور اللي بيركب فيه كابل زرار الهوم، واسمه في المخطط J2118. لما تعمله سيرش هيجيبلك أول نتيجة في صفحة المكونات، وأنت عايز صفحة الدواير، فكمّل بحث لحد صفحة 22.
أنهي خط من دول مسؤول عن الضغطة؟
إحنا عارفين إن دايرة البصمة في الآيفون اسمها MESA. يبقى أي خط مكتوب عليه MESA أستبعده من الحساب. اللي هيفضل معايا هو الخط اللي على رجل 3: BUTTON_TO_AP_MENU_KEY_L_CONN. وكلمة MENU KEY دي هي زرار الهوم.
المسار ده ماشي على إيه؟
انسخ اسم الخط ودوّر بيه في المخطط. هتلاقيه ماشي كده:
- R2160 مقاومة 0 أوم على التوالي مع الخط.
- C2167 مكثف 27pF على التوازي مع الأرضي.
- ديود حماية على التوازي مع الأرضي (اسمه في المخطط بيبدأ بـ DZ211).
- ولو دورت على الخط من ناحية المعالج هتلاقي R0313 بقيمة 392 كيلو أوم على التوالي ناحية جهد PP1V8_SDRAM، يعني 1.8 فولت.
ونتيجة تانية من نتايج البحث هتوديك على آيسي الباور، يعني الخط واصل له هو كمان.
ليه الجهاز ممكن يعمل عطلين مختلفين من نفس المسار؟
مكون التوالي لو طار أو اتحرق يبقى المسار مقطوع. يعني R2160 أو R0313 لو فصلوا، اضغط زي ما تحب، مفيش نتيجة.
أما مكونات التوازي، المكثف والديود، فلو واحد فيهم بقى موصل على الأرض يعمل عطل من اتنين: يا إما الضغطة مش بتوصل، يا إما الزرار كأنه بيضغط لوحده، تفتح أي شاشة يقوم قافلها لك، بالظبط كأنك ضغطت هوم.
إزاي تتأكد بالقياس؟
- والجهاز شغال، قس على المكثف أو الديود وشوف 1.8 فولت واصلة ولا لأ.
- اقلب على وضع البازر وافحص المكثف والديود: المفروض يدوك صوت من طرف واحد بس مع الأرضي. لو من الطرفين، فيه تسريب.
- افحص R2160.
- انتقل للمقاومة التانية اللي جنب المعالج، R0313.
وبس كده. ده مسار زرار الهوم من الألف للياء.