في آيفون 11 برو والبرو ماكس، المعالج وآيسي الباور الأساسي موجودين على البوردة العلوية. فاصل البوردتين، ومعاك السفلية لوحدها، وعايز تقيس الجهود الخارجة من باور البيزباند. ينفع؟
كممانعات ينفع عادي. بس كجهود؟ لازم البوردتين يبقوا مع بعض؟ مش شرط. طب تعالى نفهم.
باور البيزباند محتاج إيه عشان يشتغل؟
- تغذية PP_VDD_MAIN. دي بتيجي للبوردة السفلية من العلوية. يعني لو البوردتين مفصولين، مفيش تغذية.
- إشارة RESET، بتيجي من آيسي الباور الأساسي اللي على البوردة العلوية. يعني لو مفصولين، مفيش إشارة.
لو وفرت الشرطين بإيدك، الآيسي هيشتغل. والبوردة العلوية مش شرط.
ليه 3.3 فولت تكفي للاتنين؟
- أقل مستوى ممكن يشغل الجهاز على PP_VDD_MAIN هو 3.3 فولت. يعني لو ركبت بطارية أو باور سبلاي 3.3، الجهاز يبدأ يقلع.
- الإشارات في البوردة دايمًا قيمها بتتراوح ما بين 1.8 و3.3 فولت.
لاحظ إن 3.3 اتكررت مرتين. يعني باور سبلاي واحد مظبوط على 3.3 فولت يقدر يدي الاتنين، من نقطتين على البوردة السفلية.
النقطتين فين؟
في ضهر البوردة السفلية فيه مجموعات Test Points، بيكون مغطيها استيكر العزل الحراري. شيل الاستيكر، وافتح البرنامج على ضهر البوردة السفلية. هتلاقي نقطة PP_VDD_MAIN عريضة، وجنبها نقطة اسم مسارها فيه GPIO من الـ PMU لـ BBPMU RESET. يعني دي إشارة الـ RESET.
الخطوات
- قارن البوردة اللي معاك بالـ Bitmap. اقلب الاتنين في نفس الاتجاه وانزل بالزوم.
- حدد الرجل العريضة والرجل الرفيعة.
- النقطتين معزولين، فخربش عليهم.
- الحم الاتنين ببعض بسلك.
- وصل السلك على موجب الباور سبلاي المظبوط 3.3 فولت.
- وصل السالب على أرضي البوردة.
- اقلب البوردة، وابدأ قس الجهود حوالين باور البيزباند.
اللي عملته اسمه التفعيل اليدوي لباور البيزباند. وهو بيوفر عليك تركيب البوردتين عشان تقيس خرج الآيسي.