أنا بعتبر الملف والزينر دايود في أي دائرة زي القط والفار. هنتكلم عن الملف النهارده.
الملف إيه وأنواعه إيه
الملف هو سلك معزول ملفوف حول قلب، وركز معايا في كلمة معزول. رمزه على المخطط L، وفي البوردة تلات أنواع:
- ملفات ترددية في دوائر الإرسال والاستقبال، دي مش موضوعنا.
- ملفات تنعيم: بتقوّم التساقط اللحظي في التيار، حجمها صغير نسبيًا، وبتتسمى في بعض الدوائر فلاتر. وممكن الاستغناء عنها بغلق مكانها.
- ملفات تضخيم: حجمها أكبر ومتصلة بآيسي مباشرة على رجل اسمها SW أو LX. الملف بيولد مجال مغناطيسي بمجرد عبور الجهد والتيار، ولما الآيسي يغير قيم الجهد والتيار بالسويتش، بيتولد في الملف جهد أو تيار إضافي.
أغلب دوائر الرفع والخفض في البوردة قايمة على كده: الملف بيمثل شرطين (السلك والمجال المغناطيسي)، والآيسي بيمثل الشرط التالت (الحركة).
ليه هو أسوأ عنصر؟
- أي حاجة فيها مجال مغناطيسي بتولّد حرارة. الدليل إن بعض الشركات بتحط مادة تبريد فوق ملف الشحن مع إن آيسي الشحن نفسه من غير تبريد. وممكن تلاقي نقطة لون بني على بعض الملفات، أو ملفات منتفخة شوية.
- الحرارة بتنصهر العازل حوالين السلك، فيتغير عدد اللفات وقطرها، والسلك يلتصق ببعضه، ويتشوه المجال المغناطيسي اللي هو شرط أساسي للتضخيم.
إزاي تفحصه؟
هنا الأفوميتر بيفشل في كل أوضاعه:
- وضع البازر: فاشل. الملف نادرًا ما يتلف بقطع السلك، فالسليم والتالف الاتنين هيدوك صوت.
- وضع الدايود: فاشل. بيعتمد على التساقط في الجهد، وهيكون صفر سليم أو تالف.
- وضع الأوم: فاشل. المقاومة الداخلية للسلك سليم أو تالف متساوية إلى حد كبير، وتحتاج أفوميتر دقته خرافية عشان الفرق يبان.
- وضع الهنري H: مش موجود في أغلب الملتيميترات اللي في إيدينا.
- جهاز بسيط ظهر مؤخرًا بيحس بالمجال المتولد في الملف ويضوي لمبة. فكرته مبدئية وكشف غير دقيق.
- الأوسيلوسكوب: هو الوحيد الناجح، بيدّيك صورة دقيقة لعملية السويتش بين الآيسي والملف.
وكمان هتحتاج ملف سليم للمقارنة، والملفات سريعة التلف بالحرارة المباشرة لما تخلعها. ولو مافيش أوسيلوسكوب، الحل الوحيد إنك تغيّر الملف احتياطيًا في دوائر الرفع والخفض، بعد ما تتأكد من إشارات التفعيل وتغيّر الآيسي بدون فايدة.
حالة: سامسونج A04s (A047) ريستارت
الحالة اتحلت على إيد واحد من متدربينا:
- الجهاز كان مرفوض سوفت وير.
- بيسحب على الباور سبلاي طبيعي لحد 900 مللي أمبير، وبعدين ينزل ويسحب نفس السحبة تاني، في لوب.
- قاس خرج آيسي الباور جهود وممانعة ومافيش أي خلل، وقاس المكونات اللي جنب المعالج ومافيش خلل، بس لاحظ سخونة خفيفة ناحية المعالج.
- بخّر المعالج والمكونات اللي جنبه ولاحظ سخونة في المعالج نفسه.
- قبل ما يرفع المعالج، بخّر الناحية التانية من البوردة جنب آيسي الباور، فلاحظ سخونة على أحد ملفات Buck SW. نزعه وغيّره وبفضل الله الجهاز اشتغل.
والملف ده كان مسؤول عن قيمة 0.75 فولت متجهة ناحية المعالج.