سؤال بيطرح نفسه دايمًا: أجيب بديل الآيسي ده منين؟ برامج المخططات والمواقع اللي بتدور على البدائل بتبحث بـ Part Number فقط، يعني اسم الآيسي من الشركة المصنعة. ودي فعلًا بتوفر البديل، لكن مش بتوفر التوافق. وممكن تلاقي زميلك جاب آيسي تاني مختلف في الاسم واشتغل طبيعي.
القاعدة الأولى: الشركة المصنعة للهاتف بتكبّر دماغها
هو فيه شركة بتصنع أصلًا؟ كلهم بيجمعوا. هات معالج من Qualcomm أو MediaTek على باقي المنظومة ورصّ في بوردة وطلّع تليفون وتابلت.
القاعدة التانية: كل الآيسيهات خدامين عند المعالج
لو حفظت المنظومة باسم المعالج، يبقى سهل عليك لو ما لقيتش آيسي باور معين تجرب آيسي باور تاني بيركب مع نفس المعالج. ولعبة التحديثات: الإصدار الأحدث يركب على الأقدم.
القاعدة التالتة: العناوين (Address)
ليه ربطنا المنظومة بالمعالج؟ لأن المعالج متبرمج إنه أول ما يفتح يكلم آيسي الباور ببروتوكول i2c على عنوان زي 0x74، فلما يختاروله آيسي باور يختاروا واحد متبرمج إن المعالج بيجيله على العنوان ده. (نفس اللي بنعمله مع الذاكرة لما بنظبط لها Boot Config وBoot Bus).
لو مهتم بالـ Decode والبروتوكولات: لما تيجي تعمل Decode لآيسي وتعرف عنوانه في بروتوكول معين، سجّل العنوان والبروتوكول والـ Part Number، عشان لما تروح لبوردة تانية مش كاتبة عناوين في المخطط تبقى إنت المخطط.
وساعات العنوان مش بيتكتب على الآيسي إلا مع أول مرة بتشتغل فيها البوردة باور. وده بيفسر ليه لما تاخد آيسي من بوردة كان شغال فيها 100% وتركبه في بوردة تانية تلاقي خلل، وتغيره بواحد جديد يشتغل زي الفل. ده مش جن ولا أرواح.
وأوقات بيكون فيه تطابق في عدد رجول الآيسي ونفس وظائف الرجول بنفس الجهود والتغذيات، ومع ذلك لا يعمل.
بالنسبة لكل نوع آيسي
- الآيسيهات الأمامية زي الإضاءة وباور الشاشة: نفس عدد الرجول وتوكل على الله.
- مضاعفات الطاقة في دائرة الشبكة: بنفس شكل الآيسي وعدد الأرجل وتطابق التغذيات وتطابق رجول الباندات (B1 مثلًا). أو عن طريق الترانسيفر: شوف الترانسيفر اللي معاها راكب في بوردات إيه وخد منها مضاعفات الطاقة، تقريبًا بتكون المنظومة متشابهة.
- آيسيهات الشحن: نفس عدد الرجول ونفس وظائفها، والإصدار الأعلى يمشي على الأقل. وتزود عليها تفاصيل الشحن: عادي وسريع، وعلى أي بروتوكول شحن سريع، وهل فيه متحكم معاها في منظومة USB وPD ونوعه وإصداره.
- آيسيهات الاسبيكر: نفس عدد الأرجل ونفس التغذيات، وتتأكد بس إن الصوت اللي داخلها Analog ولا Digital.
وملحوظة أخيرة نادرًا ما حد بيتكلم فيها: إصدار الهاتف نفسه وجيله وسنة الصنع وأول إصدار سوفت وير نزل بيه. كل دي اعتبارات حطها في دماغك وأنت بتقلب في بوردات التقطيع عندك عشان تطلع بديل لآيسي معين.