جهاز Huawei P30 Pro داخل قاطع باور. بنبدأ بتيستر الشحن، والقراءات كانت كده بالترتيب:
- 0.09 A
- 0.15 A
- 0.50 A
- 1.30 A
- 1.80 A
- 3.00 A
- وبعدين 1.13 A
التيستر بيرفع على مراحل: تمهيدي، وبعدها مرحلة انتظار رد المعالج والذاكرة، وبعدها الشحن العادي ثم السريع ثم الرجوع للعادي، وفي كل مرة بيتذبذب للصفر. اللي بيعمل الحركة دي عادةً هو المقاومة الحرارية الخاصة بكونكتور البطارية.
القياس الأول طلع فخ
قست ممانعة مسار Batt Ts فلقيتها حوالي 1000، وفي برنامج المخططات 400. يعني سوء توصيل، فتتبعت المسار وشبلنت البوردتين (الجهاز ده في بوردته زي الأيفون، بوردتين ساندويتش).
وبعدين وصلته على الباور سبلاي، والمفاجأة: شورت صريح وسحب 5 أمبير كاملين. قست الممانعات:
ممانعة VBATT0.509 (سليمة)
ممانعة VPH0.364 (سليمة)
الممانعات سليمة وفيه شورت! حقنت في جهد التغذية الرئيسي فطلع شورت تام 5 أمبير. المسارين بيربطهم ببعض آيسي الشحن، فهو أول مشتبه. حقنت عشان أشوف مين بيسخن، فلقيت الآيسي تمام والمكثف اللي في الصورة هو اللي سخن. شيلته برة البوردة وكل الشورتات اتفكت.
مين المكثف ده؟
وصلته على التيستر فطلع تمهيدي شحن بس، وده طبيعي لأن الجهاز كان عليه شورت ومركون والبطارية فاضية. سيبته ساعتين وما قامش. لازم أفهم المكثف ده تابع لإيه.
- مخطط الجهاز: مافيش.
- البدائل: المكثف موجود في 9 أجهزة، واحد بس فيهم متاح له مخطط. فتحته ودرسته، ونفس آيسي الشحن Hi6526.
- برقم الآيسي اتأكدت إن المكثف تابع لمسارات PMID الخاصة بمكثف التخزين.
يعني طبيعي إن البطارية ما تقومش، لأن الخزانات الخاصة بآيسي الشحن مش موجودة. وحتى لو قومناها برة، ممكن يحصل واحد من ثلاثة أعطال:
- الجهاز يشحن وهمي.
- الجهاز يشحن بس لو فصل ما يقومش إلا لو فكيت الجهاز وقومت البطارية.
- الجهاز يشحن ويقوم البطارية عادي، بس لو فصلت الشاحن يعمل ريستارت أو يقفل.
فكان لازم أجيب مكثف أخوه. محتاج أعرف السعة، ومش مكتوبة في المخطط، فبدور على بوردة فيها نفس الآيسي آخد منها مكثف مطابق.
الخلاصة
- قياس الممانعات من برامج المخططات مليان أخطاء، وكان ممكن يلبسنا في الحيط من أول تحليل العطل.
- ما تحكمش على العطل من سحب التيستر لوحده أو الباور سبلاي لوحده أو الأفوميتر لوحده. اجمع بينهم تطلع بنتيجة سليمة.
- فهم وتحليل الدوائر هو العامل الأول لتحديد الأعطال، وبدونه نقط كتير هتفضل مبهمة.
- عشان تتعامل مع بوردة من غير مخطط، لازم تتقن الأول التعامل مع بوردة بمخطط.