بعد الريبولينج، أو إعادة شبلنة المعالج والذاكرة، ممكن نحتاج سوفت وير، وخصوصًا الأجهزة اللي بتشتغل بذواكر eMMC. وبتقابلك أعراض زي دي:
- أخطاء مكتوبة أعلى شاشة الهاتف، زي اللي بتحصل في أجهزة سامسونج أو أوبو.
- خطأ System Destroyed على بعض أجهزة شاومي.
- الجهاز يدخل Recovery Mode ومايخرجش منه، أو يخرج بعد فورمات بس.
- الجهاز يقلع بس تقيل جدًا أو بيهنج.
- الجهاز يقف على الشعار الأول أو الثاني.
لما يقابلك الخطأ ده، قدامك ثلاث احتمالات.
١. مراجعة شغلك كهارد وير
المعالج في الإقلاع محتاج يوصل للذاكرة، وده اسمه Boot Bus. يعني عدد مسارات الداتا اللازمة لبداية الإقلاع، مش الإقلاع التام:
| القيمة | مسارات الداتا اللازمة لبداية الإقلاع |
|---|---|
| 0x00 | مسار داتا واحد |
| 0x01 | أربع مسارات |
| 0x02 | ثمان مسارات |
لو شغال مع معالج بيقلع 0x00، فلبداية الإقلاع محتاج بس مسار D0 بين المعالج والذاكرة. ولو حصلت مشكلة توصيل من D1 لحد D7 هتتفاجئ بالأعطال اللي فوق.
ونفس الكلام مع 0x01: لبداية الإقلاع محتاج المسارات من D0 لـ D3، وفي المرحلة اللي بعدها باقي المسارات من D4 لـ D7، ولو فيها مشاكل هترجع لنفس الأعطال. أما في حالة 0x02 فغالبًا لو أي مسار داتا اتلف هتفقد الإقلاع بالكامل.
وهتفحص المسارات دي تحت الذاكرة والمعالج، إما بتطابق الممانعات أو بالأوسيلوسكوب من غير ما ترفعهم.
٢. تلف الذاكرة نفسها
الذاكرة من جوه فيها مليارات الترانزيستورات، وكل ترانزيستور بيخزن 1 Bit. وأشباه الموصلات بتتأثر بالحرارة وتتلف أثناء الرفع والتنزيل والشبلنة.
طب الوحدة التخزينية اللي اتلفت بتروح فين؟ لو التلف حصل والجهاز شغال، بيتسجل في منطقة جوه الذاكرة اسمها Control Unit، وهي زي أمين المكتبة: بترتب وتنضف أول بأول، وبتدل المعالج على الأماكن السليمة، وبتسجل الأماكن التالفة عشان تتجنبها وترحّل الداتا لترانزيستورات سليمة. كل ده بيحصل تلقائيًا لو الجهاز شغال.
لكن أثناء الرفع والتنزيل والشبلنة لو اتلفت مجموعة ترانزيستورات شايلة ملفات مهمة للإقلاع أو للتطبيقات الأساسية، مافيش فرصة للـ Control Unit تسجلها وترحّل الداتا. فلما المعالج يطلب الملفات دي غالبًا مش هتنجح، وتطلع الأخطاء. الحل بفحص الحالة العمرية للذاكرة، وممكن تحتاج سوفت وير عادي أو إعادة برمجة للذاكرة (وهنا محتاج بوكس ذواكر داخلية).
٣. المعالج نفسه
زمان كان المعتقد إن المعالج ما بيتبرمجش. لكن مؤخرًا في بعض تحديثات الشركات حصلت عمليات سوفت وير فاشلة بسبب قطاع داخل المعالج اسمه SoC، والشركات بتقفل صلاحياته أو بتتغير الصلاحيات دي أثناء السوفت وير. وهو أشبه بالـ BIOS في الكمبيوتر، مع الفرق الكبير بينهم، بس ضربت المثال عشان الفكرة توصل.
الخلاصة
- التعامل مع الهارد وير ممكن يغير خصائص السوفت وير والعكس.
- ماتستغربش إنك بعد بعض الريبولينج تحتاج برمجة.
- فني الهارد وير المحترف لازم يبقى عنده معرفة قوية بالسوفت وير.
- بوكس الذواكر الداخلية ضرورة لو عندك أخطاء كتير بعد الريبولينج.
- خد بالك من درجات الحرارة المستخدمة مع الذواكر الداخلية.